Etungo lyoomvula 40 lya kumuka po moMiami

Aahupithi yoomwenyo oye li molukongo lwa kwata miiti taya kongo ngele omu na mboka ya hupa moshiponga sho etungo lyoonkatu 12 lya li lya ongotele nokugwa po muumbangalantu waMiami. Omuntu gumwe okwa kolekwa a sa naantu 99 kaye wetike sigo oompaka. Sho oofamili dha ligamena koonkundana, oosipana dholukongo odha ti otadhi longo pwaa na oluthuwo noya ti oye uvite omakudhilo gaantu taya pampala mokati kiiyagaya moka.

Shoka sha eta opo etungo ndika lyoomvula 40 lyi ongotele mOmaandaha inashi tseyika natango. Aantu ya adha po102 oya monika, ashike inapu yela kutya yangapi ya li metungo ndyoka sho lya gu po. Yamwe yomwaamboka ya hupa ye li omulongo nasha oya li ya nanwa mo mokati kiiyagaya.

Omvula ya dhiginina yi li pamwe nombepo oya ninga onkalo yi dhigupale kaahupithi yoomwenyo sho taya longo oshilonga shoka nale oshidhigu.

Aanambelewa oya li ya tameke okukutha oo-DNA dhaamboka ye na aapambele yawo kaaye wetike, kwa ningilwa kutya otaya ka dhimbululwa nuupu ngele oya adhika ya sa nale mokati kiiyagaya moka.

Aakwanezimo yaamboka ya kana oya li ya tulwa mendiki lyoshigwana, lyi li okanano okafupi okuza petungo ndyoka lya teka po, ya tegelela uuyelele ashike oye na uumbanda neikwatopomutima.

Nicolas Fernandez okwa ti oongodhi dhaapambele ye itadhi yamukulwa.

“Ondi wete kutya katu ya na we,” osho a lombwele oshikundaneki sho-CBS. “Inandi hala okukwatwa komadhilaadhilo omawinayi, ihe otwa kala nokuyadhengela pwaa na oluthuwo ashike oongodhi dhetu itadhi yamukulwa.”

Jenny Urgelles okwa li a penduka konkundana tayi ti etungo lyaakuluntu ye olya teka po. Okwe ya dhengela, ashike oongodhi dhawo adhihe itadhi kuthwa po.

“Ondi na omukumo. Onda hala okutseya kutya oshike naana shi li po,” osho a lombwele oshitaasi shoTV ngaaka.

Oshitopolwa oshinene shi li komeho gefuta shoChamplain Towers osha li sha ongotele kuyele mEtine. Etungo ngashiingeyi iiyagaya yowala.

Ombinga ayihe yimwe oya teka po: etungo lyoonkatu 12 ngashiingeyi iiyagaya yowala.

Ou wete mo natango, mu na oondunda dhomafudho dha taalela efuta. Natango ou wete iitopolwa yoombete, iitopolwa yoondunda dhaanona dhokulala. Ayihe yi li koluhayela. Otashi togo omeho.

Oshike sha eta etungo lyi ngumuke po?

Katu na uuyelele natango. Omakonaakono ga ihwa po otaga ka tameka konima yoshikonga shokuhupitha aantu, aanambelewa taya ti ngaaka. Sho etungo ndika lya kala lya thikama okuza mo1980, olya li lya adha okutalulwa, hoka haku ningwa konima yoomvula 40. Etungo olya li tali talululwa nolya li lya pumbwa okwoopalekwa, aanambelewa taya ti.

Opwa li pe na omaupyakadhi – etungo olya ngumuka po shili,” Mayola gwaMiami Daniella Levine ta lombwele aatoolinkundana ngaaka. Iilonga yeopaleko oya li ya tameka kiipeleki yetungo, ashike mayola gwaSurfside Charles Burkett okwa ti ke wete nkene shoka osho sha eta uupyakadhi.

Omapekaapeko ga ningwa komukonaakoni a za koshiputudhilo shoFlorida International University oga li ga mono kutya etungo ndyoka lya tungwa moshiheke, olya kala nokuningina kashona nakashona, ponkatu yoomilimeta omvula kehe muule woomvula 30 dha za ko, shoka sha guma omutungilo gwetungo.

Ngoloneya gwaFlorida Ron DeSantis okwa li a Shaina omukanda gwopaulumompumbwe gwaMiami –Dade County ndjoka tayi ka gandja omakwatho okuza kehangano lyoFederal Emergency Management Agency kwaamboka taya ungaunga netungo ndika lya gwa.

Presidente Joe Biden okwa uvaneka okugandja omakwatho ngele okwa pulwa nehangano ndika olya tumwa koFlorida.