Shangula: Oonakusa oyendji yoCovid inaya tuntilwa
Minista gwuuhaku nonkalo nawa Kalumbi Shangula okwati, aantu ayehe ya si komukithi gwoCovid-19 inaya tuntilwa.
Ta ti, okuntilwa otaku dhana onkandangala onene oshowo otaku keelele omaso taga etithwa komukithi ngoka.
“Otandi tsikile okukumagitha noku tseyitha uuwanawa wokutuntilwa, kehe ngoka a tuntilwa, a mana ko omalweetho agehe gaali gowenda, ota henuka eso oshowo okukwatwa komuthi gwoCovid-19,” ta kumagidha ngaaka.
Shangula ta ti, omiti dhoka ka dhina nando uuwinayi washa ngaashi omapopyo taga taambathanwa komalungula, netompelo lyoku hongolola aantu kaaya tuntilwe. “Ehogololo lyili mondjila okutuntilwa, okugamena omwenyo goye, aapambele yoye oshowo mboka hokala mekwatathano nayo,” ta popi ngaaka.
Ta ti, oshigwana ngele osha longele kumwe, eta shuuvuko shoka tashi kumagidhiwa nasho okuza kwaamboka yena ontseyo, okulwitha omukithi nguka, Namibia otaka sinda oCovid-19 muule wethimbo ehupi.
“Shoka sha simana okugwanithapo omalandulathano noompango ta dhizi koshikondo shuuhwaku, ngele kehe gumwe okwa tuntilwa, ompito yoku kwatwa komukithi gwoCovid-19 oya shonopola,” ta ti ngaaka. Minista okwati sigo oompaka aantu ashike 26 168 ya tuntilwa iikando iyali nomuti AstrZaneca no Sinopharm oshilongo ashihe.
Ta gwedhapo ta ti, omuntu ohaya lulwa aatuntilwa uuna aamanako omalweetho agehe gaali, ihe ngele okwa wendwa ashike oshikando shimwe, ita yalulwa onge atuntulwa. “MoNamibia omwamonika omukithi gwocorona tagu ithanwa Delta ngoka taku popiwa kutya ogwa nika oshiponga nonkondo, unene kwaamboka inaaya tuntilwa nando nando. Onkene aantu naya kuthe etokolo ya kantulwe,” ta popi ngaaka. Ta ti, Namibia okwa kanitha oomwenyo dhaantu 1 650 nonando omwaalu ohagu lunduluka kehe esiku oshoka omaso otaga ende guuka pombanda kehe esiku. Oshitopolwa shaKhomas osha dhidhilikwa osho shina iipotha yomukithi ngoka yili pomanda oshowo omwaalu gwaantu oyendji yeli kiifudhitho.
“Ndika ethano lya yela kutya ngeno okwali aantu mboka ya hulitha ya tuntilwa, ngeno natango oyena omwenyo, oshoka omuti ngoka otagu shonopaleke ompito yoku kwatwa noku nkondopaleka aakwiita yolutu ya lwithe omukithi ngoka,” ta fatulula. Minista okwa kumagitha oshigwana shi gwanithepo omalandulathano agehe ka tulwa po, opo omukithi nguka gu vule okushonopala nogu hulepo.