AR ifumbela kuyumbela masila kwaofesi yatolopo

Katengo kaAffirmative Repositioning (AR) kafumbela kuyo yumbela libunda la matakala, kwaliofesi zakatengo katolopo ya Katima Mulilo, kasamulaho yomuhulu mwaofesi yasilalanda nakwalile sibaka samayumbelo atolopo mwakweli ya Kandao unumwaha. Kukwaliwa kutisize butata mwatolopo, mi matakala ni zemasila libundami feela famandu abayahi batolopo. Mwasitatimende viki yefelile katengo kaAR nekafile katengo katolopo kuisa la 20 Muyana kutatulula butata.

“Libaka zeli bukaufi zecwale kaChefuzwe, Mafuta, Kambinda ni Liselo, mumemiwa kulonga matakala anze alatelwa mwalibaka zamina kikatengo katolopo, nikuyo ayumbela kwaliofesi zakatengo katolopo, haiba kusina cinceho pili la 23 Muyana lisikafita kale,” nekubaleha sitatimende. “Lulemusa muyemeli watolopo nibayemeli kaufela bakatengo katolopo kuli halusabisi feela, kono luka eza cwalo kakuli luse lulibelezi nakao yetelele.” Kubata kufumana manzwi kumuzamaisi wakatengo katolopo Raphael Liswaniso nekupalile, kakuli nasika alabela kwamañusa ane alumezwi kwafoni yahae yafanoka, ili yene sika alabiwa hane alizelizwe.

Zeo halili cwalo yomuhulu mwaofesi yasilalanda Timoteus Mufeti, nabulelezi New Era kuli balumelezi katengo katolopo swalelele kusebelisa musima one kafumani. “Yeo kitaba yaswalelele kulumelela katengo katolopo kuliulula bayahi ni tolopo, habanze babata liñolo la kubalumelela kusebelisa sibaka,” nabulezi. Mufeti natolokile hape

kuli nebataluselizwe kamo katengo katolopo neka katazehile kubata sibaka sa mayumbelo, sina hane kana ni kuikambota nikuta ya Mafwe. Sibaka sa Mayumbelo sa tolopo nesikile sa kwaliwa, kasamulaho akupatalazwa kusalumelelwa. Kakuli nesiloba mulao, mi nesimumaneha limita zemianda yemibeli kuzwa kwaofesi yaMeatco.