Mboka ya kanitha oongombe naya thike pombala mOndonga

Ongombe ndhoka dha ningi ethimbo dha kana moshitopolwa shaShana, dhimwe dhomudho odha monika.

Sha ikolelela kelenga oshowo koshilyo sho komitiye yokulwitha iimbuluma melelo lyopamuthigululwakalo lyOndonga Lot Kasamane okwa ti, oongombe adhihe dha monika odhili 36.

“Oongombe dhoka okwali dhaadhika naalumentu yomimvo omilongo mbali nasha,” ta popi ngaaka.

Otaku hokololwa kutya oongombe ndhoka odha kala dha holekwa kOmugulu gwOnime, no hadhi falwa kaantu yeli yatano, gumwe okuli kOndjamba, gumwe okuli kOnambutu omanga yeli yatatu yeli kUukwiyu. Kasamene okwa ti, oongombe odhili pombala, mOndonga na kehe ngoka aakanitha oongombe dhe okwa manguluka okuya atale ngele oongombe dhe, opo dhili pwaadhoka dha monika po.

“Otaku hokololwa kutya oongombe dhimwe natango kadhi po poonkawo. Ongombo dhoka dhili po, dhimwe odhina uupapa omanga dhimwe ka dhina uupapa nomadhidhililoko,” ta ti ngaaka.

Ta popi ta ti, mongaashingesyi mboka yaadhika noongombe dhoka inaya mangwa po natango, oshoka oya tokola kutya kehe ngoka ena ehalo lyoku patulula oshipotha okwa manguluka okushinga ye mwene.

Kasamane okwa ti, oongombe dhoka okwali dha monika sho kwali kwa lopotwa uutana wuli uhetatu mboka wali wa adhika muuninginino wOndonga, no wali eta omalimbililo.

“Se onga iilyo yokomitiye ndyoka okwali twa tondokele po, noku dhi eta kOmbala,’’ ta ti ngaaka.

Kasamane okwati, sigo onena opena oongombe inadhi mona ooyene, ihe mboka yali ya dhimbulula dhawo, oyedhi pewa.

“Ooyene yoongombe oya ti, natango oongombe dhawo dhimwe kadhi po poonkwawo, ihe okwali dha kanene oshita nookwawo dhoka dha monika po,”ta popi ngaaka. Gumwe gwomwaamboka yali ya mono oongombe dhawo, ayambukile momukunda Oshipumbu shomugongo okwati, okwali a kanitha ongombe ye petameko lyomuvo nguka kOnoolongo. “Shika hasho oshikando sho tango tandi kanitha ongombe, onkene onda hala oku mona omufekelwa ngoka, opo ndi vule oku patulula oshipotha,” ta popi ngaaka.