Ovanadolongo paife otava talelwa po
Commissioner koshikondo shomavyulonghalo Sam Shaalulange okwa ti paife ngaha ovanhu otava kapitikwa oku talela po ovakwapata vavo ovo veli meedolongo.
Shaalulange okwa ti ovanadolongo va pewa eedula dihapu modolongo otava kala tava talelwa po okudja Etine fiyo Osoondaxa omanga ovanadolongo veli modolongo ndele inava tokolwa natango voo otava kala tava talelwa po Omandaxa fiyo Etitatu.
Okwa ti ovanadolongo itava ka pewa vali oinima ngaashi oikulya, eefewa, omiti ya dja kondje yodolongo shaashi okwa didilikwa oinima ei hai etelwa ovanadolongo oku dilila moshiwana, ha mu kala muna oingangamwifi, oimbodi ya nyika oulodi noshoyo oinima ikwao ili yanyika oshiponga, yee ta ti ovanadolongo ohava etelwa nomiti danyika oshiponga.
Shaalulange okwa ti eshi osha kala nokudidilikwa omafimbo mahapu komavyulonghalo aishe moshilongo.
“Mopaife omavyulonghalo ota kala ashike ta tambula oimaliwa oku dilila komunhu keshe e ya oku talela po. Oimaliwa ei otai kala tai pewa ovanambelewa hava longo momavyulonghalo, yee omunadolongo ta popi ne kutya okwa hala oku landelwa shike, omanga oimaliwa ikwao otai kala tai tulwa komavalulo ombaanga ovanadolongo shaashi keshi omunadolongo okuna ombaanga yaye oku haku tulwa oshimaliwa shaye,” Shaalulange ta ti.
Okwa ti ovanambelewa vokomavyulonghalo oveli longekida okukala tava yakula ovanadolongo aveshe pamukulo muwa ngaashi okulandela ovanadolongo oinima ei vapumbwa ngeenge va yakula oshimaliwa shavo.
Okwa denga omufindo ta ti pefimbo ngeenge ovanhu tave u ya okutalela po ovakwapata vavo veli meedolongo nava kale vakwashipaleka kutya otava ve li ufa komilandu doCovid-19.