Okanona komimvo 14 ki iyaha noshifufuta

Okanona komimvo 14 oka lopotwa ki iyaha nondjembo, konima anuwa ka li ka nyenyeta nomukuluntu gwa ko.

Sha ikwatelela kepeko lyopolisi, oshiningwanima shoka osha holoka moWindhoek kOtjomuise extention 4, lwopotundi 18h00 yuusiku.

Opolisi oya lopota kutya omakonaakono oge li metifa, kutya oshike sha etitha okanona ki iyahe nondjembo.

Otaku hokololwa kutya ondjembo ndjoka ya longithwa oyahe gwanakusa.

Kape na natango uuyelele wothaathaa kutya shoka sha eta enyenyeto pokati kanakusa nomukuluntu gwe, oshike.

Omupopiliko gwopolisi moshilongo ashihe Kauna Shikwambi okwa kumagidha aakuluntu ya kale ya takamitha nkene ye na okupopya naanona uuna pe na uupyakadhi nenge ye na shoka ya yona.

Ta ti, uunona wopaife ohawu longitha omalungula, pamwe oko hawu kongo nkene wu na okulwitha omawupyakadhi wa taalela, hoka haya tsakaneke iinima oyindji, ngaashi ndyoka lya tokolwa kokanona hoka.

SelmaMaria,omuhungimwenyo okwa ti, uunona wopaife owu na ombepo yimwe i li muwo, ndjoka yi na okukala ya kondololwa komukuluntu gokanona kehe, unene ngele pe na uupyakadhi.

“Uunona wopaife owa uvithwa ko kutya owu na uuthemba, onkene kau na okugandwa nenge okudhengwa uuna wu na shoka wa yono, ihe osha puka noonkondo,” ta popi ngaaka.

Ta ti, uunona otawu koko nombepo ya puka nombwiinayi.

Ta gwedha po ta ti, otashi shololitha okanona komimvo dhi thike mpoka taka ikutha omwenyo.

“Otandi kumagidha aakuluntu ayehe ya kale ye shi omikalo dhuunona wawo, nankene ye na okupopya ngele pwe ya uupyakadhi nenge wu na shoka wa ningi sha puka. Ta ti, okwa tsakaneke uunona owundji womimvo omulongo nasha, owo hawu eta aluhe omawupyakadhi momagumbo.