NSFAF indongwama babakolota ba95 000
Nihaike katengo kakabona zakutusa kulifela baituti (NSFAF) kana ni bane bakolotisizwe babaswanela kulifa ba95 000, kibabalikana feela 615 babanze bataleleza buitamo bwakulifa masheleñi ane bakolotisizwe. Mwangambolo ni New Era, sibuabui wakatengo kaNASFAF Olavi Hamwele, naize katengo kakatahisa mulelo wakufa mamela yakuzekisa kapa kubea falikepe leli nsu. Nabulezi hape kuli katengo kwamulaho kafumani butata kulifisa babaka kolota. “Nihakulicwalo, katengo katahisize mukwa omunca wakubuluka mañusa, kacwalo hamubata lika kikucoña feela,” nabulezi.
Babañwi babasikalifa cwalecwale babilaezi kuli hakiswanelo kuli balife likoloti, mi baituti babañwi babihiwa kuli mapampili abuitamo nalatehile. Babañwi kungelela cwalo ni bayemeli babaituti babulela kuli katengo kaswanela kutakula likoloti, kamaikuto akuli litaba halisika bulukwa hande. Hamwele nalatuzi likakalezo zakuli kuna ni litaba zelatehile. “Hakuna litaba zelatehile, kono lupatehile kufetula mañusa ali famapampili kuabea mwamakompiuta, ili kuli lika libe bunolo. Kutakula likoloti zabaituti hakukonahali, hakutalimiwa taba yaswanelo yakuituta mi hakuna kulumelelwa.
Nabulezi hape hala butokwa bwakulifa likoloti, ili kuli baituti babañwi ni bona bakone kutusiwa. Baituti babalikana 23 000, nebakupile kulifelwa unumwaha, kono kibabalikana feela 16 000, bane baamuhezwi babalukela kulifelwa. Mwamusulo waunumwaha katengo nekafumani masheleñi alikana lulelule (N$1.2 billion), ñohola nekafumani masheleñi alikana lulelule ni licika (N$1.5 billion). Hamwele naize baituti baswanela kulifa masheleñi kaufela ane balifezwi, nabulezi hape kuli baswanela kufa mañusa acwale kobapila, keyala ya poso ni nombolo yamuhala. Zeñwi zabutokwa kikana babeleka kapa awa, hamoho cwalo nitukululo yakuli bakale kulifa sikoloti.