Lika zesupezi lilyehisa kutisezo yamezi

Mindandwe yamapaipi asupezi yene yalilwe lilimo zemashumi amane zefelile, ibihiwa kuba sisitataliso mwakubata kukutiseza lisebelezo zamezi mwasikiliti sa Zambezi.

Mayemo ao afenyize sikiliti mwaliviki zepeli zefelile, kakuli mapaipi azwelapili kushwa mi sicaba sisiala sisina mezi.

Paipi yetuna yene ipunyehile ifumaneha mabapa ni sipatela sesituna sa Katima Mulilo, mi yomuhulu wakampani yebona zamazi mwasikiliti sa Zambezi, Joseph Mulisa yana nyatezi kuli basweli kukatazeha kukutiseza mezi, naize kupunyeza kwamapaipi ni kupuya, nekupaleliswa kampani kupompa mezi kutaza libulukelo.

“Lika zesupezi nizona litisa butata, kakuli mapaipi ase afitelezi nako ya ona mwamubu, kacwalo hasakona kulwala buima,” natiiselize.

“Hane bauzwize ntambo yamulilo wamagesi, kalulo yeo netisize butata kwalineku la minshini yepompa mezi.” Lipompi zesina mezi neli taselize bayahi batolopo ya Katima Mulilo, kungelela cwalo ni likolo ni lipisinisi.

Butata nebukalile masholi haba uzwa lintambo zamulilo wamagesi, kacwalo kampani yebona zamezi nesakoni kuhasanya mezi.

Zeo halili cwalo babakulubelwa babalalu bane batamilwe mwataba yamusholi bwalintambo zamulilo wamagesi, nebalukuluzwi bamano lumelelwa kulifa N$1 000, yomuñwi ni yomuñwi yakuli balibelele muzeko wabona kwande atolongo.

Sibuabui wasipokola mwasikiliti sa Zambezi Kisco Sitali naize babakulubelwa kiOwen Mukena walilimo zemashumi amabeli, Mayumbelo Malange walilimo zemashumi amabeli kazetalu, ni Sitamulaho Lutibezi walilimo zemashumi amabeli kazepeli.

Natolokile kuli teko yazene uzwizwe kiN$35 000, mi halisika fumaniwa kale. Mulisa nasika tabiswa kitaba yakuli babakulubelwa nebalukuluzwi, mi usaba kuli babakulubelwa bakaswana baeza bubangoki bobuswana hape.

“Kiñi hane balukuluzwi? N$1 000 yene batomezwi kiñi haibapanywa ni teko yazene uzwizwe? Micaha baa bakaya hape kuyo uzwa ni kulyehisa musebezi waluna, ili taba yeka taseza bayahi kaufela,” nabulezi.