Butuku bwataku ni mulomo kisila kwapisinisi yanama
Butuku bwataku ni mulomo bone buswelwi cwanuñu mwasikiliti sa Zambezi, bubilaeza balimi kuli haiba mayemo inge azwelapili bakasiala basina musika, haiba kampani ya Meatco inge ikwala. La 9 Muyana litatubo kuzwelela kwalabalatoli, neli nyatezi kuli butuku bwataku ni mulomo bobuzuzile cwanuñu mwasilalanda sa Kabbe ya Mutulo, butisizwe kitukokwani totunca totu bizwa 0. Zeo neli nyatezwi kiyomuhulu mwaofesi yebona zamipendo ya likomu, Dr Albertina Shilongo. “Kuambalakana kwabutuku kokutiswa kikona kakokwani kakanca, kutisa kutotobela kwakalabelo yamipendo.
Lipatisiso lisa zwelapili, kono luakaleza kuli kuna nikusilisa likomu isi kamulao mwahala sikiliti sa Zambezi ni naha Zambia, ili kokutisize kakokwani ka0,” nabulezi. Naha Zambia nebihile kuzuha kwabutuku bwataku ni mulomo bwakakokwani ka0 mwasilimo sa 2019 ni 2020. Mwangambolo ni New Era muyemeli wasilalanda sa Kabbe ya Mbowela John Likando, naize buñata bwalibaka kusali tata kuya teñi konji kakusebelisa limotikala za4x4.
“Hakutalimiwa kakokwani kakanca kanoto, babeleki kaufela babali kwalibaka zetaselizwe neba elelizwe kutuhela kufa mipendo, kakuli hauyeleli. Kono mikwa yakale yecwale kakusebelisa lizwai ibonahala kusebeza,” nabulezi. Likando naize balimi babilaela kuli haiba mayemo hana kucimbuka kampani ya Meatco ikaswana ikwala. “Pilaelo yaluna kiyakuli kukwala kwasilaha ya Meatco, kukalukutisa mwamulaho. Taba yende yatokwahala kubona kuli likomu hali icambaeli, ni kuli kampani ya Meatco izwelepili kubateñi,” nabulezi.