FlyWestairs ge Rundus tsî Katimas ǁga ra ǁkhana
FlyWestair ǁkhana!oabas ge ǂoa ge wekheb ai ǂhanusise ǀgam ǀasa ǁkhana daokha Rundus tsî Katima Mulilos hâra ǁga ge ǂanǂan.
Eros anikuniǂgāsa xu ge 24 tsî 25 Aoǁkhumuǁkhâb dis ai a ǂgaekhâise, kha ge nē ǀgam ǁkhanas daokha Namibiaǁîn tsî !auga!hūsi sari-aona, dana!ās tsî ǀawas aiǂoas ǀkharigu tsî ai!âb ǁga ra !hûǁare.
FlyWestairs ge ge ǂanǂan, ǁîn nēsi ǀgam !nāra wekheb !nâ Rundus ǁga tsî !nona !nāde Katima Mulilos ǁga nî ǁkhanasa, tsî nēs !nâ-ū !narisarimās tsî ǂharuguba nî ǀhui-amsa.
Katima Mulilos, dana!ās Zambezi ǀkharib dis ge nau SADC ǁaedi ǀkha !hûǁares di ǁkhowa-am, ǂanǂansase Zambiab, Zimbabweb tsî Botswanab hâga.
Nē ǁkhana!oabadi ǀhui-amhes ge ǁkhāti kai ǁkhamasasib hîa nē gaxu daoga nau hâ ǀkhariga xu !naris Rundus tsî Katimasa !oas xa ra !aromaheb tsîna ores ase nî ība. Nēsisan ge supuse tsî ǁaeb ai ǂharuguga nî dī.
ǀAsa !oabadi ǀhui-amhes ge ǁkhāti !âubasenhe rasa !oa
ǁnā ǀkharikha di !narisamas ǂharuguba nî hui!nâ hîa kaise !oaxase Covid-19 ǁōs xa ge tsâǀkhāheba.
Noxopa !narisarimas ǂharuguba hui!nâs ases ge FlyWestairsa, Gondwana Collections tsî ǁîs !kharaga !gûkhoenhâ!khaigu ǀkha sîsenǁareǁnâugub !nâ ge ǂgâ in nē ǀgaub ais tsîna sari-aona Kavangob ǀkharikha tsî Zambezib ǁga nana.
Katima Mulilos tsî Rundus ǁga hâ ǁkhanade ǂgâxa-ūsa xu noxopa ra !âubasenhe !khais ge, in Namibiab ǁga ra hā ǂgao sariaona nau hâ mûhesa-anu !khain xōǀkhā, Zambezib tsî Kavango ǀkharikha tsîna ǁîn !naris ǂgaekhâib ai ǀaro.
ǂHôare-aon ge nē ǀasa ǁkhanadaob ai ge ūsaohe hâ i, in mû inhemdû mâtikōsets supu tsî !hae Igaub !nâǁnā !âb Namibiab dib !nâ ǀAeǁgamsa xu sī tsî ǁkhawa a oaǁkhāsa.”
FlyWestairs ge a Namibiaǁîn xa aitsama ǀhonkhoe-aihe ǁkhana!oaba. Sida ge mîmâi hâ mâǂoa hâ tsî ǀuruhe ǁoasa ǂan-tsîhō!âs hîa ǀgau hâse ǁaeb ai hâsa mā du sa.
Nē ǀgam ǀasa ǁkhana daokha di tsoatsoas ge sida ǀguixasib Namibiab !oagu, !narisarimas tsî ǁîs ǀkha ra !gûǁare ǂharugugu tsî ǀkha hâsa ra ǁgau tsî ǂgom!gâ da rasa !oa Namibiab ǂganagab !narisarimas tsîna nî ǀomkhâi kai,” tib ge FlyWestairs di Sîsenǂuira danab Henri van Schalkwyka, ǁnā ǂhanusi ǂanǂans ǁaxasib tawa ge mî.