Surigu ǀGuitikōsib ge ECD senterde Kuneneb !nâ ǂhanusise go ǀhui-am
OPUWOS – Surigu ǀGuitikōsib, ǀGâsiba ǀOroǀoros tsî ǀHûhâsi !Oabadi ministeris di !nakaǂnôa ministers Bernadette Jaggers, ge ǂoage wekheb Denstaxs ai haka skolǂgâs ai!â hâ ǁgau!nâs senterde (ECD) Kunene ǀkharib !nâ ǂhanusise ge ǀhui-am.
Nē ǀasa ECD senterdi ge ǀonǂgais ai Katuturas, Otuveros, Orotjrindis tsî Puros hâdi hîa Opuwos Kai!ā, Opuwos !Garo!ā tsî Epupas ǁhûi!nâǂharidi !nâ ra ǁnāde. Jaggers gere mîs ge, ECD senterdi a ǂhâǂhâsaba !aromas ge ǁîdi tawan ǀgôarona ra ǁāǁāhe tsî unuhesa, !gâi tanisenxa !hūǁîsisa !oa.
!Nakaǂnôa ministers ge noxopa gere mîs ge, ôa!nâdi ge ǁgausa, ǀgôarona !oegas !harodi !nâ ǂhanu !gao!gaoba ǁguibas ǁîn ǂurusib tsî omkhâisens !nâ kai huib ase īsa, tsî nēs xōǀkhā ǀgôa-i ǁkhāsib ǁkhāǁkhāsens, hâǁareb !nâ ǂhâbasa ǁkhāsiga omkhâis, omkhâis sorosi ǁkhaubas ǀgaib dis !nâ.
ǂHanub ra ECD senterdi !nâ dī ǁguiridi ge mûmûsa hōdawasa !khōǂgā hâ, nēti ī senterdi !nâ-ū ra ǁîn skolǂgâs ǂgaroba tsoatsoa ǀgôaron ra !gâi!gâna skolǂgâs !nâ sī!nâsa tsî ǀorose ǁaeb ai!â skolǂgâsa xūmai tsî ǂhâbasa tama ǂkhawadīb ǁaxasin !nâ !âsa.
Jaggers ge ǁkhā soab ai ǁgûn tsî ǀgôarona mû!gâs !ereamsa tani hâ khoena gere ǁkhauǂui in nē ǀasa senterde !oa ǀgôarona hā-ū.
ǁîs ge !kharaga !âǀhuru-aona !oa ǁkhauǂuisa ge dī, in ǀhûǁarebese nē senterde !ûi!gâ, !goaxa surigu xas tsîna nî sîsenūhe ǁkhāse.
Nē senterdi ge ministeris di 2019/2020 marikurib di !â tsî hāǀaro ra huib European Unions 11ǁî Euopean Omkhâisens ǂGaes dib ǀkha, hîa ǁgūbas âsa ECD senterdi ǁnā ǀkharib !nâ ǂoaǂamsa sîsenna nî dīsa ǁawoǁawos ai !gaoǁgui hâse.
Jaggers ge noxopa a mîsa !oas ge ministerisa N$6.1 miljunsa ge !khō!oa nē ǀasa senterde ǂnuwi tsî Kuneneb !nâ sao ra senterde ge !gâi!gâi!nâ, ǂgaiǀons ai Kamanjab, Yvonne Pickering Sentersa Outjob !nâ tsî Warmquelle sentersa !naniǀaus ǁhûi!nâǂharis !nâ.
ǀHûhâsiba ra ǂnûǁkhaebases ge Luizinho Musungusa ǁîn dâxasibas gere gowaǂui soab ai ge mî, nē senterdi ge kaise ǂhâbasa tsî ǀgau hâ ǁaeb ai hāsa tsî nēs !nâ-ū ǀgôarona !nūse skolgu ǁga īs soab !aroma ores ase a hā amaga.
Musungus ge ministersa ǁnā ǁawosasiba ge mā, nē senterdi nî !gâise !ûi!gâhesa ǁnā mâ!nâdi hâ ǀhûhâsigu ǁanin xa.