NAMBTS ta ningi oshikonga shokuyandja ohonde meefikola
Ngaashi naana kwa didilikwa kutya ehangano lokuyandja ohonde ola taalela omhumbwe yohonde, onghee ehangano lokuyandja ohonde loNamibia Blood Transfusion Service otali ka tameka noshikonga meefikoladokonooliopoovanafikola va ka yandje ohonde.
Edi oda popiwa komupopiliko wehangano loNAMBTS Titus Shivute eshi ta hokolola ta ti elalakano loshikonga eshi opo ovanafikola va kale vena eudeko kombinga nghee sha fimana oku yandja ohonde. Onghee okwa ti okwa teelelwa ovanailonga wehangano lohonde opo va kale va taalela po eefikolo dayooloka dokonooli, omo ovanafikola tava ka yandja ohonde.
Shivute okwa yelifa ta ti ovanafikola vena eedula 16 -17 otava kala va kalelwa po kovakulunhu vavo pefimbo tava ka yandja ohonde shaashi ina fika okukala veli kalela po vo vene, omanga ovanafikola vena eedula 18 okuuka pombada otava dulu okukala va yandja ohonde, onghee itava kalelwa po shaashi eedula davo oda wana okuli kalela po.
“Oshikonga eshi otashi kala sha ningwa koitukulwa yayooloka moshilongo, omo eefikola tadi kala da talelwa po kovanailonga vehangano lokuyandja ohonde opo vanafikola va kale va yandja ohonde,” Shivute ta ti.
Shivute okwa ti oshikonga eshi otashi tameke tete kosekundofikola yaGabriel Taapopi Etitatu potundi 09h00, onghee ovanafikola ova teelelwa opo va kale va holoka momwaalu munene opo va ka yandje ohonde.
Okwa popya ta ti ovanafikola vomomudinoko waNgwediva navo ova manguluka opo va kale va ka yandja ohonde, onghee keshe omunafikola ena ehalo lokuyandja ohonde okwa manguluka a kale a fika kosekundofikola yaGabriel Taapopi Etitatu potundi 09h00 fiyo 14h00.
“Ohandi kunghulile ovadali opo va kale tava longo ounona vavo kombinga yefimano lokuyandja ohonde shaashi eshi otashi tu ovanafikola omukumo va kale vena ohokwe yokukala tava yandje ohonde,” Shivute ta ti.
Okwa denga omufindo ta ti ohonde oya fimana kovanhu veli momhumbwe yohonde, onghee oku yandja ohonde oshinima sha fimana unene osheshi ota shi xupifa eemwenyo dovanhu.
Shivute okwa kunghulila oshiwana opo shi twikile noku liufa komilandu edi da tulwa po dokukelela ombuto yoCovid-19.