Ocovid-19 oya lopotwa tayi indjipala moosikola
Uuministeli wuuhaku nonkalo nawa owalopota omukithi gwoCovid-19 guuka pombanda unene moosikola.
Minista guuhaku nonkalo nawa Kalumbi Shangula okwati, aantu yeli 98 oya kwatwa ko Covid-19 oshilongo ashihe, ihe yeli 38 yo muyo aalongwa.
Shangula okwa kumagidha aanilonga mendiki lyelongo ya tuntilwe, opo ya shonopaleka omukithi ngoka.
“Oshigwana nashi itulemo mokutuntilwa,okugamenaomalutu gawo gaa kwatwe komukithi ngoka,” Shangula a kumagidha.
Ta ti, nonando iipotha ya lopotwa otayi ende tayi shonopala, oshigwana nashi tsikile okugwanitha po oompango oshoka omukithi ngoka ohagu lunduluka ethimbo kehe.
Ta kumagitha oshigwana shi tsikile okuzala uumasika, kwiiyoga koonyala oshowo okupititha po ehala pokati komuntu nomuntu.
“Pethimbo ndika uuministeli welongo ina wuya po nonkatu yontumba omolwo mwaalu ngoka gwa lopotwa gu li pombanda moosikola, oshoka otu uvite kutya, aanona itaya ehama, ihe oya ninga ashike iihakanwa,” ta popi ngaaka.
Omukuluntu gwelongo moshitopolwa shaShana Hileni Amukana okwa po pile ta ti, shoka inashi pumbwa okuhalutha oshigwana oshoka aalongwa itaya ehama.
“Oosikola opo dha tameke, onkene aanona yamwe okwa li ya gongala piituthi ya yolooka mpoka omukithi gwocorona hagu taandele mbala. Oyendji ocorona oya zi nayo mefudho,” Amukana ta ti ngaaka.
Ta ti, kashi shi uupyakadhi natango nonando otaya tsikile okukondololo onkalo yomukithi ngoka moosikola.
Amukana ta ti, omwaalu ngoka okwa li gwa pitithwa konima aanolongwa ya li ya tutswa, sho yamwe yo muyo ya li taya ulike omandhindhiliko gocorona, ihe itaya ehama.
“Katu na uumbanda natango, oshoka omukithi omo gu li momalutu getu nonando itatu ehama, onkene uunona wosikola pethimbo ndika nawu tsikile ashike okugwanitha po omalandulathano noompangodhokukeelelaomukithi gwo Covid-19,” Amukana ta ti.
Omukuluntu gwelongo okwa kumagidha woo iikundaneki, yi kale hayi lopota tayi nengeneke, oshoka oonkundana dhimwe itadhi hokitha, ihe otadhi mbandameke.
Ta ti, aakuluntu ngele oyu uvu omukithi gwa ponokela mosikola yontumba mu na oyana, nena kegumbo omwenyo pehala otagu zi po, naashoka otashi ka etela aakuntu oyendji uupyakadhi.