Oonakusa yoCovid-19 yamwe natango inaya mona aakwanezimo

Omukonakoni womikifi mounisteli wouhaku nonghalonwa Emilia Konstantia ota hokolola ta ti okwa didilikwa okila yoshipangelo shaCentral moWindhoek ina omalutu ovanhu va fya kombuto yoCovid-19 oku dja momwedi Juni.

Meenghundafana a ninga naKundana Konstantia okwa popya ta ti oministeli oya kala nokuninga eenghandambala opo ikwatafane novakwapata vena omalutu oonakufya vavo eli mokila, ashike oya xulila mounyengwi shaashi eengodi davo oda dima efimbo keshe ngeenge tava dengelwa, omanga eenomola dimwe oda shangwa da puka.

Konstantia okwa yelifa ta ti ovakawapata dimwe kadina sha oshimaliwa shokulongifa opo di dule okuninga omapako oonakufya vavo, onghee eshi osha eta opo omalutu ovanhu va fya kombuto yoCovid-19 a kale eli mokila efimbo lile. Okwa ti nonande epangelo la tula po omalombwelo kutya omunhu ngeenge a fya kombuto yoCovid-19 okuna okukala a fudikwa meni lomafiku eli 10, eshi oshi li eshongo la taalelwa kouministeli shaashi mokila natango okwa didilikwa omalutu eli 80 ovanhu va fya koCovid-19 a kala mo efimbo lile. Okwa ti ouministeli owelipyakidila nokukonga ovakwapata vena oonakufya vavo va kala mokila efimbo lile opo epangelo li kale la ninga omalongekido okukala la yambidida ovanhu vena oupyakadi wopashimaliwa.

Kombinga yoshikumungu eshi sho malutu a kala mokila efimbo lile, omukulunhuwiliki moumisteli wouhaku nonghalo nawa Ben Nangombe okwa popya ta ti oshiwana na shi kale tashi pula ekwafo kepangelo ngeenge tashi nyengwa okufudika ovakwapata vavo opo kukeelelwe eekila diha kale dihadi unene omalutu oonakufya a kala mo efimbo lile.

“Ovanhu na va kwashipaleke kutya ova shiivifila ouministeli wouhaku ngeenge velihange veli moupyakadi wo kufudika oonakufya vavo opo epangelo li kale la ninga omalongekido okukwafela ovanhu tava nyengwa,” Nangombe ta ti. Okwa weda po ta ti oshiwana na shi twikile okukala tashi liufa komilandu edi datulwa po doCovid-19 shaashi omukifi ou owa nyika oshiponga neenghono.