Yayee Oongangala monooli!
OPOLISI moshitopolwa shaShana kunkilile oshigwana shi kale sha tonata sho shi kale shi na oonomola dhopolisi dhomeendelelo oshoka oshitopolwa oshiihanenwa kookalyamupompo.
Omupopiliko gwopolisi moshitopolwa shaShana Thomas Aiyambo okwati, oombudhi odha ninga odhindji mondoolopa yaShakati, Ongwediva oshowo Ondangwa, onkene oshigwana osha pumbwa okukala sha kotoka kehe mpoka shili. “Opolisi yaShana oyiilongekidha aluhe okuyambidhidha oshigwana uuna sha lopota omaupyakadhi ngele sha ponokelwa kookalyamupombo mboka taya yuugu oshigwana,” tayi ti ngaaka. Opolisi oya popi ngaaka konima ya ningi ethimbo tayi lopotelwa iiningwanima yoludhi ndoka tayi indjipala mondoolopa, unene tuu mbyoka yoositola naantu taya yugwa iimaliwa kookalyamupombo. “Oshiwike sha ziko omulumentu gwomimvo 51 okwali ayugwa iimaliwa yithike N$45 000 sho kwali ekeyi nana mombaanga onene yaStandard bank,” Aiyambo ta hokolola.
Ta ti, natango shoka okwali sha holoka omasiku omashona sho natango mulumentu gumwe ali a ponokelwa kaafuthi kOshikango noku yuga oshimaliwa shithike N$900 780. Aiyambo okwa ti, oya dhidhilike wo natango kutya oombudhi dhimwe otadhi zi kiitopolwa yilwe yoshilongo okuningila aantu omiyonena miitopolwa yokonooli.
Ta ti, oyalopotelwa natango omagumbo taga teywa, onkene oshigwana otashi kumagidhwa kaashi thige omagumbo ka gena aantu. “Aafuthi otaya longo ya itula mo onkene oshigwana nashikale sha kotoka,” ta ti ngaaka. “Otandi kumagidha oshigwana shi longele kumwe nopolisi opo kehe gumwe a kale e na onomola yopolisi, opo shi lopote kehe shimwe tashi holoka moshitopolwa,” Aiyambo ta ti ngaaka.
Ta ti, opolisi oyiilongekidha ethimbo alihe, okugamena oshigwana. Onomola yomeendelelo yo polisi 081 363 0666 .
Aiyambo okwati, mehuulilo shiwike oya lopotelwa omalutu gaantu yaali ga adhika momapandaanda. “Olutu lwokanona ko mimvo inaadhi shiwika olwa adhika metoto lyiiyagaya yamuni gwaNdangwa, nangoka eka ekelehi mpoka ina shi wika,” ta ti ngaaka. Tati, natango olutu lwaNicodemus Erastus Shikongo olwa adhika luna iilalo aluhe, ihe kapena uuyelele wothaatha waashoka sha holoka po.