‘Vanona vetu ngavatengura awo nonsigwe’
Ministeragona gerongo Faustina Caley kageve ruguwo rwendi morwa mukaro nye ogu vana kugwanekera nago vanona gomukisi ogu goCovid-19 guna kunana siruwo ngesi gwahana kulihorako. Mepuragero sinkwa ntani na Nampa, ministeragona katente asi awo kuna kara nowoma kuhamena sivaro omu sina kukanduka unene sonomfa omu yina kumoneka asi sinzi sovanona navakara nonsigwe eyi ngayivaninkisa asi kapi ngavatengura kosure, ano ava nye ngavatengura vana pumbwa ehungo mwenyo nokuvavatera paukanguki. ‘’ Woma wetu kuna kara asi sinzi sovarongwa ngavatengura awo nonsingwe kepwizumuko eli vana kara nalyo ngesi. Ose twakona kukara tatuyigazara eyi nomu tuna kumona vantu vana kufa unene, sinzi sovarongwa vetu yiwo nye vana kuvhumbika vakurona, vareli, ntani ekoro lyawo lyavakundama. Ngoso, ose twahepa nye kuturapo nonakmbadaro dina kutanta asi ngapi omu natuyavhura kuvavatera apa navatengura,’’ yimo ana kutanta Caley. Nokugwedako asi vanona apa ngavatengura tavakagwana hena asi vazumbanesa varongwa vawo ntani varongwa vakwawo nawo vavasiga. Age katente asi epangero kuna kupapara vahameseremo vahakuli vadiva kugava ehungo mwenyo nokuhundira vatiungimo vahali uwa vavatere epangero melikwamo eli vana hara kukaturapo. Ministeli ngesi kuna kudeura vamitili avarongo sirongwa sohungo mwenyo vakare vana vadeura omu navakavatera momunene vanona apa navatengura kosikora.
Awo ngavagwanekera noministeli zehetakano mvahrwa ntani maruha gamwe oku kwakara varugani vadiva yehungo mwenyo yipo vagave pambero unene kowo vana kara moudigu ou. ‘’Udigu wetu kuna kara kovarongwa ava navakatjanga ekonakono lyoponze zosirongo. Twahepa kuvadimbnurura yipo asi tugave mbatero vana hepa morwa tayikakara udigu kwawo ngazara tupu munona ana horokere vakurona vendi makura atameke hena kuliwapoayikira ekonakono, ekona kono lyenene ngahana kugwana mbatero ,’’ yimo ngoso ana kuyitjangurura Caley.
Mosiruwo sooso, NANSO,muhuyungili kombunga ozo, Esther Shakela, katente asi nawo vana divako Yuma asi ngapi yina kuhoroka omu vantu vanakudogoroka sinzi sovarongwa sirongo mudima, omu nawo vana kugazara asi vahepa kukara novantu wovanzi vadiva yehungo mwenyo yipo asi vagave mbatero kowo vana zipumbwa. Age katente asi NANSO nage ana kara nonomora zendi ezio zokufungwinina mawokowoko omu varongwa vana pumbwa mbatero navafunguna. Ose simpe tuna kara nevango eli lina kugava mbatero unene kovarongwa. Morwa sivaro nye esi sina kara somapongo, evango lyetu ngesi kapi lina kiurugana moomu lyawapera, nye mbatero zangoso kozili, yipo nye tuna kuhundira varongwa varuganese evangoi olyo nolyo lina kugava,’’ yimo ana kutanta Shakela. -Nampa