Ship Chandler otaka yambidida evyulonghalo moWalvis Bay
Ngaashi naana kwa didilikwa kutya oshikondo shomavyulonghalo moNamibia osha pumbwa oku yambididwa, Ehangano loShip Chandler otali ka yambidida okutunga endiki lokuningila oinyangadalwa yofikola kevyulonghalo laWalvis Bay.
Okwa didilikwa evyulonghalo laWalvis Bay la kala nokutunga etungo la nuninwa okukala tali longifwa kovanadolongo opo va kale tava ningi oinyangadalwa yavo yofikola.
Oilonga yokutunga etungo eli oya kala ya xulifwa po shaashi oshikondo osha kala shaa taalela eshongo lopashimaliwa opo li manife okutunga endiki lofikola yovanadolongo.
Pefimbo Kundana a ninga eenghundana nomunambelewapitifi kevyulonghalo laWalvis Bay Josef Haufiku okwa popya ta ti omukulunhu wehangano loShip Chandler Ivo De Gouviea okwa udanekela evyulonghalo laWalvis Bay kutya ota ka manufulula okutunga endiki lofikola eli.
omukulunhu wehangano loShip Chandher okwa ti otava ka tuma ovanhu op ova kale va tameka oilonga yokutunga endiki opo li kale lapwa okutunga, nokulongifwa kovanadolongo mokulonga oinyangadalwa yavo yofikola ngaashi okuxwikila, okulihonga okutunga, okuhondja nosho tuu oinyangadalwa ikwao yayooloka.
Haufiku okwa ti osha fimana ngeenge ovanadolongo tava longifa ounongo wavo shaashi eshi otashi vape ohokwe yokukala tava dulu okweetaposha shipondolifa nokukala yo vali tava xwaxwameke ovanadolongo vakwao va kale vena ohokwe nomukumo wokulongifa ounongo wavo.
Omukulunhu wehangano olo, oye umwe woilyongudu wiliki yokuyandja omayele kevyulonghalo laWalvis Bay.
“Onghee ngaa natango hatu indile oshiwana opo shi yambidide oshikondo shomavyulonghalo shaashi otwa pumbwa oikwafifo yokulongifwa kovanadolongo ngeenge tava ningi oinyangadalwa yavo. Onghee hano oshiwana osha manguluka opo shi kale shetu waimina mokutuyambidida,” Haufiku ta ti.
Okwa weda po tati evyulonghalo laWalvis Bay onghee ngaa tali kwashilipaleke kutya ovanadolongo ova amenwa kombuto yoCovid-19, onghee okwa ti otava kwashipaleke kutya ovanadolongo navo ovatunhilwa oCovid-19 shaashi osha fimana
ngeenge omunhu atunhunilwa.