Nomutji detintiko ngesi dina gwanene-Shangula
Ministera goukanguki ndokotora Kalumbi Shangula katente asi Namibia ngesi kuna randa nomutji tintiko dina gwanene do Covid-19 ntani awo kuna kuza simpe komeho mokudigwederera nomu vana kudihanesa vadigwane vantu omu vana tura nye elikwamo lyawo paveta. Shangula kahundilire vaNamibia asi vahepa kuza vaka gwane uhaku morwa sirongo ngesi sina kara nonomutji tintiko dina gwanene.
Nomutji edi twagwana mokuditupa kuna kara 75 000 do Astra Zeneca datunda ko Netherlands mo 8 Siwogedi 2021, 20 000 Sinopharm datunda koZimbabwe mo 31 Siwogedi 2021, 15 000 Spunk V (momuzo kumwe 1) kwatunda kepangero lya Serbia mo 2 Sitarara 2021 omu hena vayagava ruha rwauvali ro Spunk V dina kutunda simpe ko Serbia simpe tadi wiza. ‘’Ose simpe kuna kundindira tugwane 318 720 nomutji do Astra Zeneca dina kutunda koGermany, 1000 620 do Pfirzer dina kutunda koAmerika ntani 30 000 Hyatt Vax dina kutunda ko United Arab Emirates ,’’ yimo ngoso ana kutanta Shangula.namibia dogoro papa kwaranda 40 800 nomutji doAstra Zeneca omu vana randa kupitira mo Covax edi kavagwene mo 10 Sitarara 2021. ‘’ Edi kuna kara nye yihupwa yo 108 400 nomutji edi epangero lyaranda nare. Simpe kuna hupu 350 000 lyonomutji doSinopharm edi veranda kowo ava dirugana , ano edi ezuva lyado eli dayasika navadigava konyima , yimo ana kutanta Shangula. Shangula katente asi kodili nombudi vana kugava dina pilire kukara asi usili asi sirongo saNamibia kwagwana nomutji edi dazonauka nare. ‘’ Ame kuna kukandurapo nombudi dangesi nokutanta asi oyo yimpempa yakahurako, kuna kara yimpempa yene yene. Muhoko gwahepa kuyizuvha asi nomutji nadinye twagwana vaNamibia, dikare asi kwaditupa ndi kwadiranda epangero simpe kuna kara melikwamo lyokudiruganesa ntani dina kara nongwaangwa, tadituparura vaNamibia. Vantu kuna kumupukurura asi kugava nombudi dahana asi uhunga kuhamena Covid-19 ngoso ove kuna kutura nzo. Morwa mukarpo nye ogo, nkenye gumwe ono kutanta nombudi dahana asi usili kuhamena Covid 19 ove ngoso tazikukwama kwama veta. Ministera goyipangura Yvonne Dausab kahundilire vantu asi vaze vakagwane vendwa ezi ntani nsene kapi ono kulizuvha nawa zende kovahakuli oka gwane mapukururo oyo kuna kara nye mpito zongwa nomukaro gomuwa kuyirugana. Ose kuna hara tukare nosivaro seesi sovantu wovanunu esi tuna kara nose ngesimakura twahepa kuwapukurura omu tuna kurugana nyamwetu mokupira kulikundama,’ yimo ana kutanta Dausab. Dogoro paapa, 232 051 kwagwana etintiko ko Sinopharm ano Astra Zeneca wokusika ko 142 127 vaNamibia vagwana etintiko eli nalinye moomu lyawapera kutunda mo 19 Nsinano 2021.