Ovanyasha vashona va tunhilwa moshitukulwa shaHangwena
Omukulunhu wouhaku moshitukulwa shaHangwena Johannes Hango ota hokolola ta ti ovanyasha vashona va tunhilwa ombuto yoCovid-19 mokufaafanifa novakulunhu moshitukulwa shaHangwena.
Okwa ti ovakulunhu ovo vamwe va didilikwa tava i ketunhilo lomukifi woCovid-19 komandiki a yooloka ouhaku.
Hango okwa hokolola ta ti ombelelwa yaye oya didilika ovanyasha tava ende nakashona okuya komandiki ouhaku va ka tunhilwe.
Okwadengaomufindotatiomitidokutunhila oCovid-19 omo di li da wana moshitukulwa shaHangwena, onghee ota kunghulile oshiwana opo shi twikile nokukala sha ya momwaalu munene ketunhilo lombuto ei.
“Ombelewa yange otai longele kumwe novaleli vopapalitika oshoyo ovaleli vopamufyuululwakalo opo tu kale twa ninga oshikonga shokukala atu yandje etumwalaka moshiwana kombinga yefimano lokutunhilwa. Otwa hala ovanhu va kale ve na ohokwe yokukala va tunhilwa shaashi eshi osha fimana mokukala ve liamena kombuto,” Hango ta ti.
Okwa kunghulila ovanhu opo va xulife po okukala tava tandaveleke ouyelele woipupulu kombinga yovenda yoCovid-19 shaashi eshi otashi kufa ovanhu ohokwe yoku ka tunhilwa.
“Okwa didilikwa eengeleka dimwe tadi hongolola ovanhu opo vaha ka tunhilwe shaashi vati ovenda ei oya nyika oshiponga. Eshi nashi mone exulilo shaashi otashi pukifa ovanhu ava ve na ehalo lokukatunhilwa,” Hango ta ti.
Okwa popya ta ti ombelewa yaye oye lilongekida okukala ya ka ninga etunhilo momikunda edi di na ovanhu ve lishangifa okutunhilwa,ongheehanooshafimanakovanhu opo va kale ve liunganeka nawa ndele ookansela ile oomwene vomikunda tava lombwele ombelewa youhaku yopashitukulwa opo ku kale kwa ningwa omalongekido etunhilo. Okwa ti momafiku 27 Sepetemba ombelewa yaye otai ka ninga oshikonga shetunhilo lombuto yoCovid-19 koshikandjohoololo shaKongo, omo ovanhu ve li shangifa okutunhilwa tava ka kala va vendwa.
Okwa popya ta ti ombelewa yaye oya yakula omwaalu muhapu wovanhu vokoshikandjohoololo shaKongo veli shangifa okutunhilwa. “Otwa kwafelwa komahangano nokombelewa yangoloneya waHangwena, omo twa pewa oyeendifo yokukala atu longifa pefimbo loshikonga eshi hatu ka ninga koKongo,” Hango ta ti Okwa ti ovaleli nava kale tava longo oshiwana kombinga nghee sha fimana ngeenge omunhu a tunhilwa opo ku shunifwe etandavelo lombuto pedu.
Okwa ti ovanhu nava twikile okuliufa komilandu doCovid-19 ngeenge tava i ketunhilo shaashi omukifi ou owa nyika oshiponga neenghono.
– fhamalwa@nepc.com.na