Elelondoolopa lyaShakati lya kumagidha aakulupe kaaye na iiyemo ya inyolithe

Elelo lyondoolopa lyaShakati olya ithana aakulupe ayehe, kaaye na iiyemo ya sha nenge aayakuli, opo yaa ki ishangithe.

Omukuluntupitithi gwomauyelele melelo lyondoolopa yaShakati Katarina Kamari okwa ti otaya ithana aakulupe nelalakano lyokweetela aakulupe omayakulo popepi.

“Aakulupe mboka taya ishangitha oomboka ye na omimvo okuza 60. Mboka kaaye na iiyemo yasha yokomwedhi okuza komahangano galwe, kakele kopenzela yEpupa,” ta fatulula.

Ta fatulula kutya ngoka ha mono oshimaliwa komwedhi oshoka okwa li omuniilonga gwontumba, ina pitikkwa okwiishangitha.

Kamari okwa ti, kehe ngoka ta ka nyolwa na kale e na o akaunta yomeya pegumbo, negumbo nali kale lyi li kedhina lye.

Tagwedha po ta ti, omukulupe kehe ta ka nyolwa na kale omukalimo gwomOshakati.

“Omukulupe na kale ha zi megumbo lye moka, ina kala a thiga po egumbo a ya komagumbo gomiti,” ta popi ngaaka.

Ta gwedha po ta ti, mboka ye na oohiila nege oongeshefa dhilwe, inaya pitikwa oku ishangitha.

Kamari okwa ti, naya faalele okamutse koshilongo, oshowo ombapila yomeya.

“Uuna omukulupe ita vulu okuthika poombelewa dhetu, okwa manguluka okutuma ko ngoka e li popepi, itashi dhengele opo a kale a thika ye mwene,” ta ti ngaaka.

Ta ti, otaya ka ninga omapekaapeko gwomagumbo agehe okukwashilipaleka kutya uuyelele wa gandjwa owoshili.

“Uuna omukulupe, mwene gwegumbo a hulako ihe egumbo olyi li natango kedhina lye, egumbo ndyoka inali pitikwa okwiishangitha,” ta fatulula ngaaka. Kamari okwa ti, elelo lyondoolopa yaShakati, olyi na ohokwe okulongela aakalimo yawo uuwanawa owundji monakuyiwa.

“Out na etengenekothaneko lyokuningila aanuulema omawunawa,sha ikolela kuulema ye na momikalo dha yooloka,” ta po pi ngaaka.

Ta ti, otaya ka tseyitha komasiku gokomeho uuna omawunawa

gaanuulema taga ka tameka.