Uuvudhiya tau ka mona oshitaasi shopolisi
Sha landula iiningwinima ya yooloka hayi holoka koshikandjohogololo shUuvudhiya moshitopolwa shaShana, oshitaasi shopolisi oshi li metifa oku etwa popepi.
Timoteus Shivute, kansela gwoshikandjohogololo shUvudhiya okwa koleke kutya, oshitaasi shopolisi otashi peya shi thikame momumvo tu uka.
“Otwa kambadhala poompito adhihe, nkene tu na oku eta omayakulo gopolisi po pepi, ihe okwali twa yamukulwa niitya tayi mwenyeke no tayi etitha omukumo okuza koombelewa dho pombanda kutya ositasi sho polisi otashi ka thika mUuvudhiya,” ta fatulula ngaaka.
Shivute ta ti, mehuulilo shiwike okwali ya talelwa po kaanambelewa aanene, mboka ya li ye ya okutala nokuulikilwa ehala ndyoka ta li ka tungwa oshitayi sho polisi moshikandjohogololo moka.
“Onkundana otayi nyuwitha omakutsi, onkene kayishi kumwenenwa oshoka otwa kondjo ihe tatu sindana,” Shivute ta popi ye ta imemeha. Ta ti, oya kala ethimbo kaayena ositasi yopolisi, ya kala ya taalela onkalo ondhigu noonkondo oshoka opolisi ohayi zi ko kule okuya okugandja omayakulo.
“Ondiinekela kutya ositasi yi li pope pi no yi li momudhingoloko, otayi ka kwathela okushunitha iimbuluma pevi oshowo omaupyakadhi haga holoka,” ta ti ngaaka.
Ta ti, aakalimo pamwe ohaya longo omiyonena oshoka pamwe kaayena ngoka ya tila, onkene ngele opolisi oyi li po pepi otayi mbandamitha ngaa yamwe.
“Opolisi oyasimana okukala yi li momundhingoloko, oshoka oyo egamena lyetu, uuna twaadhika komaupyakadhi ga yooloka,” ta popi ngaaka.
Ta ti, oye li metegelelo ewaanawa okupewa omaymukulo gawo ga hugunina, kutya uunake ositasi ndyoka tayi ka tameka okutungwa noku tameka okulonga.
Ta ti, elalakno oku eta omayakulo naakalimo po pepi.
Omukalimo gwomoshikandjohogololo moka Selma Nashilongo okwa ti, onkundana oye mweetele enyanyu enene, oshoka oya kala ya taalela uupyakadhi.
“Otwa kala ta tu mono iihuna okuya okukakonga omakwatho Konkani nenge kOnaanda, ondiinekela ndjika otayi ke tuteta omagulu, okuthika noku mona omayakulo,” ta popi ngaaka.