Omasiku gahamano ga piti inaku lopotwa eso lyoCovid-19
Nonando omukithi gwoCovid-19 ogu li tagu indjipala miitopolwa yilwe yokonooli, uuministeli wuuhaku nonkalo nawa owa ti, omasiku gahano oga piti inaaya lopotelwa eso lya etwa komukithi gwoCovid-19.
Minista guuhaku nonkalonawa Kalumbi Shangula okwa ti ndjoka onkundana ombwanawa oku uvika oshoka oomwedhi twa zi mudho, esiku kehe okwa li hali lopotwa eso nenge omaso.
Shoka otashi ulike kutya oshigwana osha kambadhala okugwanitha po omalandulathano noompango dha tulwa po okukondolola omukithi ngoka.
“Ta ti, uupyakadhi owu li kuushayi hoka taku lopotwa iipotha oyindji, uunene mendiki lyelongo,” ta popi ngaaka.
Ta ti, okwa li a kumagidha uuministeli welongo wu huleko oongako noku ndhiginina oompango nomalandulathano oshowo oku ka tuntilwa.
“Natu tsikileni nombepo ombwanawa nelandulathano oshowo okukutha onkatu yi li mondjila yoku katuntilwa okushonopaleka ompito yomukithi ngoka noku gu keelela,” ta kumagidha.
Shangula natango okwa li a kumagidha oshigwana kutya nashi kale sha tuntilwa omanga ethimbo lyomatango omanene inaali thikana, oshoka olyo ethimbo lyiituthi nomangundumano haga holoka. “Ethimbo ndoka omangundumano ohaga kala ogendji omolwa iituthi ya yooloka, nomukithi ohagu taandele mbala poompito ndhoka,” ta popi ngaaka. Ta gwedha po ta ti, oshihwepo ngele wa tuntilwa. Ta ti, kehe ngoka inaa tuntilwa oku na ompito onene yokukala a kwatwa komukithi, shoka tashi vulu oku eta omaso oshowo uuwehame. Shangula ndhoka okwa li e dhi popi esiku a li ta taamba omiti dhi li 201 600 dhoAstraZeneca okuza kepangelo lyaGermany .
“Omiti mongaashingeyi ondhi indjipala, dhili kehe pamwe onkene kape na etompelo lyomuntu a kale inaa tuntilwa, okukutha ashike etokolo lyahugunina nolyomondjila,” ta popi ngaaka. Minista okwakumagidha wo mboka ya tuntilwa, ya tsikile okugwanitha po oompango, oshoka itashi ti, ngele owa tuntilwa ito kwatwa kocorona.
Ta ti, ndhimbulukwa kutya omukithi ngoka inagu mona epango natango, okwa monika ashike omiti ndhoka tadhi koleke aakwita yo lutu okushonopaleka ompito yoku kwatwa komukithi ngoka.