Kwafela Oshiwana Foundation onghee ta twikile nokuyambidida oshiwana
Ehangano Kwafela oshiwana onghee natango tali twikile nokuyandja omakwafo koshiwana shi li moluhepo eshi la yambidida Aina Festus Etivali, a pewa omilambo dokaana kaye ka dalwa noulema koshipangelo shaShakati.
Festus oku na okaana ke na odula neemwedi omuwoyi ka dalwa ke na oulema komatako shaashi kake na sha ombululu ei hai pitile onyata ngeenge ka pumbwa okuya kondje.
Mopaife ngaha okaana oka tuwa ombululu medimo keendokotola opo ka kale ta a longifa endjandja ngeenge ta kai kondje shaashi inaka dalwa ke na ombululu komatako.
Festus oku li moshipangelo paife shaShakati nokaana kaye taka mono epango shaashi oka nika ounghudi medimo.
Pefimbo eli moshipangelo okwa dengela ehangano Kwafela Oshiwana Foundation ta kwena ta ti okwa pumbwa omilambo dokukala ta di ke okaana kaye pendjandja eli lili medimo shaashi onyata ohai pitile kendjandja lomedimo.
Onghee naashi osha eta opo ehangano Kwafela Oshiwana Foundation a landele okaana omilambo dili 500, di fike pongushu N$1200.
Omukulunhu wehangano laKwafela Oshiwana Foundation Paulus Kornelius okwa ti ehangano lavo otali lalakanene oku kwafa oshiwana ashishe eshi shi li momhumbwe, onghee okwa denga omufindo ta ti elalakano lehangano oku yambida oshiwana eshi sha pumbwa omakwafo.
Kornelius okwa ti ota lalakanene okushakeneka epangelo ondjilakati mokukondjifa oluhepo nondjala.
“Ovanhu veli momhumbwe na va kale tava kwatafana nombelewa yetu yehangano i li mOndangwa, opo va kale va yambididwa noipumbiwa va pumbwa,” Kornelius ta ti.
Okwa weda po ta ti keshe omunhu okwa manguluka opo a kale evawaimina, vo vashiive va longele kumwe nokuyambidida oshiwana shi li moluhepo.
Pefimbo ta tambula ko omilambo dokaana kaye Festus okwa popya ta ti okwa pandula unene ehangano eli eshi la yambidida okaana kaye shaashi okwa li eli momhumbwe yomilambo.
“Natango onda pumbwa omakwafo ahapu ngaashi oshimaliwa shokulanda omashina okaana shaashi iha ka dulu okulya oikulya ikukutu, oha kali ashike okatete ka tulwa omashini,” Festus ta ti.
Okwa weda po ta ti okwa pumbwa oulapivokukalatapushulapendjandja lokaana shaashi endjandja ola pumbwa okukala la wapalekwa efimbo keshe opo kukelelwa okaana ka ha kwatwe komikifi dimwepo.
Okwa ti keshe ou e na ehalo lokumuyambidida na kale a kwatafana naye konomola yongodi yaye yopeke 0814923336.
Festus okwa ti ota ka pandula oshiwana eshi tashi ke mu yambidida nokaana kaye.
“Kalunga iha kwa telwa ngeenge ta tenge, oushitwe wakalunga iha u yolwa shaashi kushi kutya ote ku ningile shike mongula,” Festus ta ti.
– fhamalwa@nepc.com.na