Oyendji monooli yuuvuko uuwanawa wo tuntila
Konima oshigwana sha mono euveko lyagwana kombinga yoku tuntilwa okukeelela omukithi gwoCovid-19, oyendji okwali ya ningi omaindilo opo ya etelwe otuntila po pepi.
Kansela gwoshikandjohogololo shaRuacana Andreas Shintama okwati, iigongi oshowo omakumagidho ya kala taya gandja moshigwana oga kwathela, oshigwana osheya mehwata, ta shi pula otuntila.
“Oshigwana paife oshina euveko lya gwana, onkene otashi pula okutuntilwa.
Nonando kandina omwaalu gwiihwa po kutya aantu ya ngapi taya pula otuntilwa, otandi kwashilipaleke kutya, oyendji oyena ohokwe yoku tuntilwa,” ta popi ngaaka.
Shintama ta ti, oshiwike sha ziko kOnandjandja okwa li kwa tuntilwa oshigwana oshindji nonkoondo.
“Otuntila ndjoka tayi katameka, otayi ka tameka mo mukunda Omuhama momasiku 18 Kotomba omanga kOnandjandja omo20 oshowo Onangombe 23, hoka tayi ka hugunina” ta tseyitha ngaaka.
Ta ti, onkundana ndyoka yaakwashigwana taya pula otuntila, yeli mehwata otayi mwenyeke oshoka oyuutiveko nkene yena okukaleka po oomwenyo dhawo.
Kansela gwoshikandjohogololo shaShakati gwokuuninginino Aram Martin okwa ti, nonando petameko otuntila okwa li ya uvika ko epuko, omolwa omilombo kwali dhaandjanekwa moshigwana.
“Otuntila moshikandjohogololo moka otayi ka tameka momasiku gamano gaKotomba momikunda Oshikolongondjo, Uukwiiyongwe oshowo Oshuulo. Momasiku gaheyali otayi ka kala kUuthilindindi,” ta tseyitha ngaaka.
Ta kumagidha oshigwiana shi thike mehwata ngaashi nana sha ningi omayindilo shi etelwe otuntila po pepi.
Martin okwati, shoka otashi uulike kutya oshigwana oshina euveko lya gwana paife, no sha ndhimbulula uupyakandhi hau holoka uuna omuntu inaa tuntilwa.
“Oomwenyo ondhindji odha kanithwa, ihe oyendji yo muyo inaatuntilwa. Ota tu tsikile okukumagidha mboka natango ye li ompinge netuntilo, kaaya adjaneke oonkundana kandhili mondhila,” ta kumagindha ngaaka.
Kansela okwati, sho ya kala taya ningi iigongi noku andjaneka omauyelele kombinga yotuntila ndyoka, oyendji oya li ye shi eta puuyelele kutya okwali ya pukuthwa.
Martin natango okwakumagidha aalongwa ya hala okuninga omaindilo kiiputundhilo yopombanda ya ka tale, oofoloma poombelewa dhawo. “Nonando oofoloma ndhimwe omasiku gawo gwoku ninga omaindilo oga pita, haa ndhihe, onkene naya thike opo ya ninge omaindilo,” ta popi ngaaka.