Ovanhu va ninga oihakanwa yokufila momeva neudo moMusati va fika po15
Oshitukulwa shaMusati osha ninga oshihakanwa shovanhu tava fi omeva eshi mwa lopotwa ovanhu 15 va fya omeva neudo komikunda da yooloka.
Onghalo yovanhu tava fi omeva oya hanya neenghono, omo ovakulupe nounona va ninga oihakanwa yokuwila meendobe nomamatale omeva.
Keshe koshivike moMusati ihamu kala inamu lopotwa oshiningwanima shomunhu a fya omeva Ounona ovo unene ve li momwaalu muhapu eshi va fila momeva ngeenge tava life ile ngeenge tava di keefikola.
Oshiwana nopolifi osha kumwa unene komwaalu tau ende wau ka pombada efiku keshe kovanhu tava file momeva.
Omaandaxa komukunda Ombafi, moshitukulwa shaMusati omwa fya ovakainhu vatatu vovakwashiwana vaAngola eshi va wila metale pefimbo kwa li tava kwata eeshi. Komufala wopolifi moshitukulwa shaMusati Commissioner Titus Shikongo okwa hokolola ta ti ovakainhu okwa li tava kongo oilonga yomomaumbo pomudingonoko waGongo.
Okwa ti ovakainhu ovakwashiwana vaAngola ove li teyela moshitukulwa shaMusati vehe na epitikilo eshi veu ya okukonga ouxupilo. Oshivike sha djako Etine moshitukulwa shaMusati komukunda Ontanda okwa lopotwa omukainhu pamwe nounona vaye vavali va fya eshi va wila mondobe yomeva pefimbo kwa li tava tau luka oshana yomeva pamwe noludalo laye.
Omaandaxa oshivike sha djako natango mOmusati omwa lopotwa ovanhu vatatu va fya omeva mwa kwatelwa omukulupe weedula 78 nounona vofikola.
Pefimbo loshiningwanima eshi Kundana kwa li a fika petale opo pa fila ovakainhu vatatu Omaandaxa, ovakwashiwana vopomudingonoko opo ova hokolola tava ti eshi kashishi oshikondo shotete metale olo ta mu file ovanhu ndele oshili oshikando oshitine.
Kondjeni Immanuel omukalimo womukunda Ombafi nokwahokololela Kundana ta ti metale omo omwa ka nifila eemwenyo dovanhu vahetatu paife va fya eshi va wila metale.
“Paife otuna oumbada shaashi etale eli oli li unene popepi neendingosho, ounona vetu navo ove li meshongo linene lokuwila metale shaashi kapena sha eameno la wana,” Immanuel ta ti.
Okwa ti ota indile epangelo opo li tule ko oluumbo lodalate i kale ya dingonoka etale opo kukelelwe ovanhu vaha ninge vali oihakanwa yokuwila momeva.
Rosinda Mwanyangapo naye omukalimo womukunda Ombafi, okwa ti konima yeedula mbali metale olo okwa li mwa wila natango ovalumenhu vatatu va fya eshi kwa li tava kwata eeshi. “Ovadali natu kaleni a tu tonatele ounona vetu momidingonoko unene tuu pefimbo eli lodula shaashi neudo otuna omwaalu muhapu wounona va fya omeva,” Mwanyangapo ta ti.
Okwa weda po ta ti epangelo nali kale tali tula omatale moluumbo lodalate aa eli mokati keendingosho shaashi osha nyika oshiponga neenghono.
Commissioner Shikongo naye onghee ngaho ta kunghulile oshiwana opo shi kale sha kotokela omave shaashi okwa didilikwa oshitukulwa shaMusati sha ninga oihakanwa yovanhu tava file momeva.