Aakiintu nayo otaya vulu okukala aahondeli
OMUPOPILIKO gwelelo lyopamuthigululwakalo Frans Enkali Etiyali okwa fatulula muule, shi na sha nokupangulwa uuna omuhondeli oshowo omuhondelwa ta pangulwa.
“Elelo lyOndonga ohali tala tango ku ngoka a tulilwa mo oshipotha kutya omulumentu nenge omukiintu, sha ikolela ku ngoka ta lopota oshipotha,” ta fatulula ngaaka.
Shika okweshi popi moku fatulula oompango niifuta nosho wo omapulo ngoka ngali geya po gena taga pula ku fatululwe kutya olye ta tali ko onga omuhondelwa na ta talika ko kutya oye omuhondeli.
Oompango dhelelo lyOndonga, ndhoka dha faathana nomalelo agehe gAawambo otadhi ti, omuhondeli okuna okufuta oongombe dhi li ndatu nenge oshimaliwa shoN$4500, omanga omuhondelwa taka futithwa ongombe yimwe nenge oshimaliwa N$1500.
Ta ti, omukiintu ngele okwa lopota kutya okuuvite uudhigu sho omusamane gwe ha yiwa naye miihulo, nena omukiintu ngoka hayi miihulo nomusamane gwaantu, oye ta futu oongombe ndatu nenge oshimaliwa shoka N$4500.
“Ngele omulumentu okwa lopota omulumentu a yi momilalo nomukulukadhi gwe, nena omulumentu ngoka naku ya momilalo nomukulukadhi gwaantu oye ta futu oongombe dhoka ndatu nenge
oshimaliwa shoka omanga omukiintu naku yiwa naye momilalo ta futu ongombe yimwe nenge oshimaliwa shoka shoN$1500,” ta fatulula ngaaka.
Enkali okwa fatulula kutya nonando nale omukiintu oye a li a tali ka ko kutya ye omuhendelwa omanga omulumentu okwali omuhondeli, mo ngaashingeyi ayehe otaya vulu okukala aahondeli nenge aahondelwa.
‘’Osha kala hashi talelwa methano ndyoka oshoka aalumenutu oyo ya kala haya thiki paakintu tango okuya hola, ihe
moongaashingeyi aakiintu nayo ohaya vulu okulonga iilonga mbyoka.
“Shoka sha pumbwa okutseyika oshoka kutya, elelo lyOndonga aluhe oha li pangula lya ikolela ku ngoka a tula mo oshipotha,” Enkali ta yelitha ngaaka.
Ta ti, itashi ti kutya gumwe ohafutu oshishona, ihe ayehe otaya vulu okushi futa.
“Iimaliwa nenege oongombe hadhi futwa ohayi gandjwa kwaangoka a yonena, ihe ethimbo ashike limwe oshipundi shelelo hashi pewa po.
–