Ovanhu tava kupula oimbodi peenhele inadi fwa nava lopotwe - Akwenye
Eshi muni waWindhoek a didilika ovanhu ve hole okutula oimbodi keshe pamwe, omupopiliko woshilando shaWindhoek Harold Akwenye okwa kunghulila oshiwana opo shi kale tashi lopotele eembelewa davo kombinga yovanhu tava kupula oimbodi peenhele odo ina di u fwa okutulwa oimbodi. Okwa ti elalakano oku kele ka po oshilandopangelo sha hele nawa nokukala shili ponomola yotete menenedu laAfrica moukoshoki. Akwenye okwa ti Namibia oku li ponomola onhi-nano moukoshoki muAfrica eshi e na oshilandopangelo sha hela.
Edi Akwenye okwe di popya Omaandaxa eshi a ninga eenghundafana naKundana eshi a kunghulila oshiwana opo shi kale tashi longifa omadoloma oo a tulwa po ku muni opo va kale tava e kele mo oimbodi.
Mexuliloshivike muni waWindhoek okwa ninga oshikonga shokuwapaleka kolukanda koHavana eshi kwa li ovakalimo vomoHavana pamwe novanambelewa va dja mu muni waWindhoek kwa li tava wa paleke.
“Oshikonga yokuwapaleka osha enda nawa eshi oshiwana kwa li sha holoka momwaalu muhapu okukufa ombinga okuwapaleka momidingonoko davo,” Akwenye ta ti.
Okwa ti oshikonga eshi otashi twikile komalukanda a kwao opo ovakwalimo va kale va xwaxwamekwa okukala ve na ohokwe yokuwapaleka omidingonoko davo.
“Osha fimana ngeenge hatu kalekei po oshilando shetu sha hela nawa shaashi oshilando shaWindhoek osho shimwe hashi fikile ovatalelipo tete okudilila kondje yoilongo,” Akwenye ta ti.
Akwenye okwa ti keshe oshivike muni waWindhoek oha yandje eenailona kovakalimo opo va longife okutula mo oimbodi.
Okwa weda po ta ti oshiwana nashi kale tashi wapaleke meni nokondje yewoofa davo opo kukelelwa omifiki edi hadi dulu oku etwa kekako.
- fhamalwa@nepc.com.na