“Otwa handuka eshi oikulya ya ninga nai omanga fye hatu dengwa kuNakaidi”
…Ovakalimo mOkambebe tava nyenyeta
O vakalimo womomukunda Okambebe moshitukulwa shaHangwena ova holola ehandu lavo eshi mwene womukunda wavo vati a kala a patela oikulya yoshikukuta monduda yaye yamangeshefelo i li poundingosho pOkambebe. Pefimbo Kundana a talela po onduda omo vati mwa patelwa oikulya, oshiwana osha ti osha handuka neenghono eshi oukutu 12 nomakende omaadi atano a ninga nai konima eshi oikulya ya kala ya patelwa monduda okudja momudo 202 0. Umwe womovakwashiwana okwa hondamena mekende londuda ya mwene womukunda ndele ta mono mo oukutu woufila ve li pedu va ninga nai eshi va tukwa omanga vamwe ova pomboka. Naashi osha eta opo ouyelele u fike moshiwana nokombelewa yakansela woshikandjohoololo shaNgenga nokovatoolinghundana. Etitano oshiwana mwa kwatelwa kansela woshikandjohoololo, opolifi novatoolinghundana okwa li va fika ponduda oyo ya lopotwa kutya vati omu na oikulya yoshikukuta ya ninga nai. Onduda ya mwene womukunda okwa li ya teywa shaashi kakwa li pe na eeshapi dokupatulula po eshi vati da kana okudja omudo 2020 onghee okwa ningwa onghendambala opo omakumba onduda a kale a teywa po shaashi ovanhu okwa li va hala okutala ngeenge eshi oshili tuu eshi tashi tongwa ile pamwe oipupulu. Konima eshi onduda ya teywa omwa hangika oukutu 12 nomakende omaadi atano a ninga nai nale. Umwe womovakalimo womOkambebe, omukulupe weedula 65 okwa lombwele Kundana ta ti ova uda nai neenghono eshi oikulya yoshiwana ya kala ya patelwa monduda ya mwene womukunda oule wefimbo lile omanga momukunda waye mu na ovanhu va dengwa kondjala “Kashi li mondjila eshi oikulya ya ninga nai ponhele mwene womukunda a yandje oikulya komaumbo aa e na ovanhu ve li momhumbwe yoikulya,” omukalimo ta ti. Omukulimo umwe naye ina hala edina laye la tumbulwa, okwa lombwela Kundana ta ti eeshapi doponduda ya mwene womukunda kakwa li da kana shili shaashi mwene womukunda okwa kala e shi kutya monduda yaye omu na oikulya kwa li ya xupa po i li monduda yaye. “Mwene womukunda pamwe nelelongudu eli hali tukula oshikukuta ova dopa okukala a shivfiila oshiwana kutya monduda omu na oikulya ya xupa po, shaashi ngeno okwa li va yandja ouyelele moshiwana ngeno oikulya ei oya ya topolelwa nale omaumbo aa e li momhumbwe yoikulya,” omukalimo ta ti. Umwe womovanyasha naye okwa holola ehandu laye eshi a lombwela Kundana ta ti ohava ningi omitumba loikando ihapu momukunda wavo ashike mwene womukunda pamwe nakapatashu oshoyo oilyowiliki yomukunda ina lombwela oshiwana kutya ope na oikulya i li konduda ya mwene womukunda inai mona oovene. Pefimbo ta nyamukula omapulo oshiwana, mwene womukunda Filemon Nghipangwa okwa ti kakwa li e shi ngeenge monduda yaye omu na oikulya yoshikukuta shaashi konduda okwe lixula ko okuya ko momudo 2020. “Okwa li ashike ndi shi ngeenge ovanhu aveshe ova pewa oikulya yavo, ashike onda kala ngoo nda didilika kutya ope na oukutu wamwe kwa li va xupa po inava mona oovene. Inandi ka uda nee ngeenge oukutu ovo osho va ilwa ko koovene ile ahawe,” Nghipangwa ta hokolola. “Onghee ame kandi na eshi ndi shi kombinga youkutu voufila shaashi nakansela eshi a pula nge ngeenge monduda yange omu na oikulya yoshikukuta okwa li da kumwa, ame onde mu nyamukula kutya kamu na sha oikulya shaashi kandi shi shi.” Okwa ti onduda yaye okwa li tai longwa kounona wambulavo eshi kwa li tava longulula meni ashike okwa li e shi ngeenge oovene voikulya ova ila po nale oikulya yavo pefimbo eli kwa li ounona tava longulula monduda. “Konima eshi ounona va mana okulonga monduda eeshapi oda kana vati onghee omudo wa dja ko , 2021 inandi enda mo monduda omo, ame vali kandi shi ngeenge omu na oikulya yoshiwana,” Nghipangwa ta hokolola. “Onda pandula unene kwau a eta ouyelele ou kombada, ohandi yandja ombili moshiwana eshi oikulya ya ninga nai shaashi nda dopa oku i yandja kovanhu ve li mumhumbwe yoikulya.” Ovakwashiwana ova lombwela Kundana tava ti mwene womukunda wavo ota popi oipupulu shaashi okwa kala e shi kutya monduda yaye omu na oikulya kwa li ya xupa po, yee vali konduda yaye oko ha kala ha i shito eshi haka tala ngeenge oya teywa. Kansela woshikandjohoololo shaNgenga Mathew Shikongo okwa ti ka shi shi efano liwa moshiwana nokOvanamibia aveshe eshi oikulya yepangelo ya ninga nai omanga pe na oshiwana sha pumbwa oikulya. Okwa kunghulila oshiwana opo shi kale tashi lopotele ombelewa yaye pefimbo kombinga loinima yoludi ei opo ombelewa yaye i kale ya kandula po omikundu diva. - fhamalwa@nepc.com.na