Oonakufaduka po ohombo moBurkina Faso va holama mehongo
EDILAADILO longhalamwenyo nomulumenhu ehe mu shi nale otali mu piyaaneke. Marie, ka li po eshi eefamili mbali da kundafana opo a hombolwe komulumenhu a dja pomukunda wopoushiinda monooli yaBurkina Faso. Ka li ngoo ne nande a pulwa opo a yandje eliudo laye kombinga yohombo oyo ya li ta i longekidwa.
Mokulipula moule, okakadona aka komido 20 oka tokola opo ke lidenge ofuka yaKaya mokati koufiku, taka ekeleshi okakalata kongodi opo ofamili yako ihe ka konge, nokuxwateka ka yuka komuhandjo woosesta. Oku oke wete kutya otaka ka dula okuhondama opo ka dule okutwikila ehongo lako.
“Tatekulu a dala meme oye a li a hala okuyandja nge opo ndi ka hombolwe. Ovadali vange voo inava tya ko sha ketokolo olo,” Marie oo ka li a hala edina laye loshili li fatulwe ta ti. “Kakwa li tava dulu okutya sha shaashi itava dulu okuya omhinge netokolo laye,” ta hokolola ye ta lumata oipanyala yaye.
Eehombo defininiko odi li kondje yoveta moBurkina Faso, ashike fiyo opaife onghee ngaho pe na vamwe tava pula komesho nado. Oukadona veedula 18 okuyuka pombada onghee tava kondjifilwa meehombo moshilongo eshi shiyadi Ovaislam noshi na oluhepo lamemememe. Okuyandja po okaana ngaho mohombo otashi tula omboloto poshitaafula omafiku onhumba. Oyoonda moshilongo omo ohai kwafa eefamili noshimaliwa ile noikulya.
Ashike eehombo odo ohadi eta opo oukadona ovo tava hombolwa va ninge omateelelo kuyele nokufiya po ofikola. Oshiwana osho shi li moshitukulwa shaSahel shi li mombuwa yaSahara osho unene hashi ningi oshinima eshi.
Omishangwa depangelo laBurkina Faso otadi ti opa lopotwa oibofa 650 yeehombo da kondjifilwa ovanhu noibofa 2 200 yeehombo dounona pokati ko2019 no2021, ashike otashi dulika omuvalu da pita po opo shaashi eehombo doludi olo ohadi kala oshiholekwa shinene.
Oukadona ve dulife po100 ova holama keumbo loosesta yedina Sainte Maria Goretti, oko naMarie e li nota ka shuna mofikola diva.
“Vamwe ova kwatwa keenghono, vamwe ova dengwa,” Sister Veronique ta ti.
Veronique ohafile oshisho oukadona ngaasho ooEvelyne (16) oo kwali ta kondjifwa kuxekulu opo a homolwe komulumenhu a kola konima eshi omukunda wavo wali wa ponokelwa
kovanamapove.
“Onda uda eshi kwali tava kundafana ndele handi li vake mo meumbo nokufaduka po,” Evelyne ta hokolola omanga ina ya kofikola.
“Ame nantango okaana, vali onda hala okulongwa,” Evelyne oo naye edina eli halo loshili ta ti.
Ovakulunhu vaEvelyne okwali vemu shikulila ko komuhandjo, ashike ovanailonga vopaundjolowele ova popya nanvo oku va udiva ko.
Sister Veronique ta ti oukadona vahapu ohava kala noudjuu oku ikilila onghalo yomomuhandjo petmeko, ashike eshi ohashi kwata ashike okafimbo kanini.
-Reuters