Etameko leetundi kEenhana NUST tali ende nawa - Shikulo
Omukulunhuwiliki woshipupudilo shoshitai shEenhana NUST Dr Lukas Shikulo okwa ti oilonga yokuyandja eetundi moshipupudilo shEenhana NUST otai ende nawa.
Shikulo okwa ti ovanafikola 436 ova tameka neetundi davo momaifano a yooloka eshi va tameka nale okuninga oinyangadalwa yavo yofikola.
Okwa ti ovanafikola otava ulike elitulemo petameko eshi vahapu hava fiki keetundi fimbo omanga vamwe ova tameka oku shi endifa nawa moilonga yavo yofikola nale.
Shikulo okwa ti oshipupudilo shavo otashi lalakanene okuyandja ehongo longushu kovanafikola nokukwashilipaleka kutya ovanafikola otava ka pita nawa oilongwa yavo opo va dule okumona eedjapo davo ngeenge va mane okulihongela omaifano avo.
Okwa hokolola ta ti Eenhana NUST otadi lalakanene okushakeneka ovadali ve na ovanafikola hava fikola pEembaxu ondjilakati eshi NUST a yandja eembesa mbali kovanafikola opo va kale tava tutwa ngeenge tave uya keetundi nongeenge va dimbuka.
Okwa ti elalakano okukandula po omukundu wonghalo yovanafikola tava faula keetundi eshi vehe na oshimaliwa sholefa shaashi okwa didilikwa ovanafikola vamwe hava di kokule shoshipupudilo.
“Otu na eembesa mbali hadi tutu ovanafikola efimbo longula, omutenya nokomatango. Ombesa yimwe ohai tamekele okulondeka ovanafikola hava di ombinga yaEenhana omanga ombesa yimwe ohai londekela kOnhuno,” Shikulo ta ti.
Okwa ti eifano loCriminal Justice itali ka longwa vali efimbo lokonguloshi ngaashi kwa li sha ufwa shaashi okwa didilikwa tashi kala shidjuu kovanafikola hava di komikunda eshi tava kala hava fiki oufiku komaumbo shaashi eetundi davo ohadi dimbuka potundi 21h00.
“Elalakano opo tu kufe po eetundi dokonguloshi osheshi otwa hala ovanafikola va kale ve li meameno ngeenge tava i komaumbo,” Shikulo ta ti.
Okwa weda po ta ti oshipupudidilo osha didilika eshongo leengulu inadi wana okulongela ovanafikola ve li shangifa koshipupudilo opo eshi ovanafikola vamwe hava kala vatelela vakwao va pwe okulongwa opo nawa va longife ongulu.
Shikulo okwa ti oshipupudilo oshi na ovahongi vahetatu hava longo efimbo keshe omanga ovahongi vamwe hava di koshipupudilo shavo shokoWindhoek have uya okulongele mowambo oivike ivali vo tava shuna ngeenge va mane.
“Onghalo yovahongi hava di koWindhoek oshi li eshongo linene shaashi ohashi pula oshipupudilo opo shi longife oshimaliwa shihapu okufutila ovahongi onhele apa hava di mEenhana,” Shikulo ta ti.
Okwa weda po yoo vali ta ti ovakwashiwana vomomudingonoko ova manguluka opo ve uye okutopolefana omayele avo kombinga yoshipupudilo shaEenha NUST opo va dule okukundafana kombinga yomikunda da yooloka da talelwa koshipupudilo.
Pefimbo Kundana a talela po oshipupudilo shaEenhana Etine komunda Eembaxu okwa ovanafikola ova hokolola tava ti ova hovela eetundi davo nawa eshi hava pewa ehongo longushu kovahongi ve na omiyono yokulonga omaifano oo tave li hongele.
Kashe Tuyeiko omunafikola woshipupudilo opo nokwahololela Kundana ta ti ova pandula NUST eshi a yandja eembasa kovanafikola shaashi paife ohava longo noupu ngeenge tave uya keetundi.
“Ovadali vetu paife ihava kala vali ve na oshisho shoku tupa oshimaliwa sholefa shaashi paife otuna eembesa do shali,” Tuyeiko ta ti.