Omukaga gwa hulu
Aamati aagundjuka yeli yepipi lyomimvo 20 sigo 30 oya li yaadhika koshifokundanaeki shika ongula yOmaandaha taya kwata oohi dho kukalya momagumbo oshowo dhoku shingitha.
Aagundjuka mbaka taya ti, ohaya menekela po ongula onene, lwopo04h00, taya ka tala ngele moonete omwa ya oohi.
Taya ti ohaya tameke okukwata oohi uuna ya mono kutya odha adha okukwata.
“Omvula ngele ya loko unene, ohapu piti oshiwike sho tango omeya taga tondondoka. Taku landula uuhi uushona, taku landula oontangu, po opo ne oohi oonene tadhi landula ko,” osho gumwe gwomu yo a hokolola.
Ta gwedha po ta ti, nonando taya kwata oohi dhawo mpoka okuza ongula sigo lya toko, ihaya si le po ondjala oshoka ohaya teleke oohi dhawo momukalo ngoka ya hala pomauluwa gwawo mpoka.
“Oombiga dhetu otudhina mpaka. Ohatu tema ashike omulilo mbala tse ta tu tsikile niilonga yetu,” ta ti ngaaka.
Ruben Nuunyango gwomomukunda Okapumbu moshitopolwa shaMusati okwa ti, ethimbo ndika lyomeya ogendji miishana, oondjato dhawo ohadhi kala dha pama oshoka oshimaliwa otashi kondo ethimbo kehe.
“Ookasitoma mpaka oto ti ashike ino hala we, ethimbo alihe otadhi ende ashike. Ota tu pandula oshoka oohi ohadhi kandula po omukaga oshowo oompumbwe dhilwe ngele twa landitha,” ta popi ngaaka.
Nuunyango okwa ti, shoka sheyahingi mo momagumbo oluhepo oshoka kayena iilonga.
“Otundji tu li mpaka otwa mana eilongo kiiputudhilo yopombanda ya yooloka, ihe inatu mona iilonga, onkene otuna okukambadhala naashoka tashi vulu okutuhupitha” ta hokolola.
Wilhelm Autale gwomomukunda omo tuu moka okwa ti, ohaya landitha okapandi koohi dhili 15, koshimaliwa N$20 ashike.
“Ohatu vulu natango okukwata mo oohi dhilwe ngaashi iikende, nonando kayishi oyindji ngaashi oohi dho yene dho shiwambo. Iikende ohayi kala yina ondando yoshimaliwa yi ili, omolwa uutoye wa yo,” ta imemeha.
Maria Shilongo ayambukile kOgongo okwa ti, aluhe ta galikana, oha tumbula omvula, oshoka ngele omvula inayi loka iha mono iiyemo ya sha.
“Omvula ohayi pendje iikulya ya yooloka ndikalandithe opo ndi mone ombolooto. Okuza kiilya, iikulya yomepya ngaashi omakunde, oofukwa, iitila no sho tuu, nda kwatelamo omboga, omafuma oshowo oohi,” ta fatulula ngaaka.
Ta ti, ngele omeya ga pwine mo miishana nomvula tayi shuna, ohandi landitha iilya, omahanda oshowo oohi dha kukuta.
“Sho osho shoka handi longo nda itulamo opo ndi likole iilandithomwa yandje ya gwana omanga italala. Itandi mono iihuna omanga ndina oonkondo dhoku ilongela ngame mwene,” ta ti ngaaka.
Shilongo okwa kumagidha aanyasha yathigepo omalukwalwa gawo opo yaka nyangadhale nashoka tashi vulu okuyapa iiyemo.