Okuza kuunahama oku ninga omulongwa-longi
‘….ondjila nde ende onde, yo ondhigu’
ONKALAMWENYO oya dhigupalelandje, onda hala okumana ihe kandi na mpoka handi zi, kandi na iikutu oshowo iikulya. Ohandi kwatwa komadhilandhilo go kuthiga po uuyuni mbuka, ihe natango ohandi tula omutima mombinzi uuna nda dhilandhila ondjila nda enda.
Osho Joseph Natangwe Inane, mulongwa e li momumvo omutitatu koshiputundhilo shuuhongi mOngwediva a hokolola onkalamwenyo ye ndjoka ya hepekwa noonkondo koluhepo.
Sho ali ta hokololele Kundana, omugundjuka nguka okwali ta zi omahodhi ye ta hekumuna, ta hokolola nkene onkalamwenyo yoluhepo yemu thiminike opo a ka konge iilonga yuunahambo nokonima uusekuliti, opo a vule oku tsikila eilongo lye. “Kakwa li oshipu, onda punduka iikando oyindji, ihe ohandi ihungu omwenyo kutya, nandi thikame ndi tsikile ngame ndi tale mpoka tandi huulile,” ta hokola ngaaka.
Omugundjunka nguno a yambukile momukunda Oshitutuma moshikandjohogololo Oniipa okwa hokolola ta ti, nonando ina tyapula onkalamwenyo ye okuza kuunona, okuna natango omukumo kutya esiku limwe otekeyi tyapula. “Okuza kuunona wandje onda kala tandi nyangadhala opo ndi fute osikola oshoka aakuluntu yandje kaye na iiyemo yasha. Aakuluntu yandje ihaya kwata natango openzela,” ta popi ngaaka.
“Ta ti, sho ndi li moondondo dhopevi okwa li handi landitha oombe nenge tandi limi momapya gaalongi yandje opo ndi mone oshimaliwa sho kufuta osikola oshowo sho kufala omweelelo kegumbo.
“Onkalamwenyo oya ende tayi yaga kesipa sho tandi koko. Aakuluntu yandje inaya longwa, aamwameme ayehe oya thiga po oosikola, otandi pandula, elongo inali kala ndje kokule,”ta popi neyeme.
Natangwe okwa ti, omolwa onkalo ya nyaika megumbo, oshali sha nkundipaleke omandhilandhilo ge, okwa li andopa ondondo 10 niitsa 20, shoka kwa li she mu hingile a ka konge iilonga.
“Onda li nda mono iilonga kohambo kUulunga waKolondo, hoka kwa li handi kwata N$200. Oshoka ka kwa li ndina nkene, onda li ndi idhindhimike, sigo ndaka mona iilonga yuusekuliti kehangano Jupeter mOndangwa,” ta hokolola ngaaka.
Ta popi ta ti, nonando uumaliwa mboka ha kwata kawu shi uuyamba, okwa li ha topola okutumina omboloto kegumbo. Ye ta gongele sigo a gwanitha okwiifutila a igwedhele ko kiitsa ye.
Ta ti, ka kwa li nando a sholola sigo a kambadhala okupula omakwatho moshigwana noshimaliwa opo a ka tsikile eyilongo lye koUnam.
“Otandi pandula oshoka epangelo olya yambindhindhandje no kufuta osikola” ta pandula. Natangwe okwa ti, nonando ondjila ye ya thiki mpoka, natango ota nyengwa kolukalwa lwokuza mOngwediva oshowo oompumbwe dha kehe esiku.
Natangwe ota pula moshigwana ngoka ta vulu okumayimbindha, opo a vule okuka kayambindhindha aakwanezimo ye.
“Omashongo ogendji noonkondo, ashike ondina omukumo kutya siku limwe kemanya naku kaza ontsi”.
Tatingokatavuluokumuyambindhindha na dhenge konomola 081 862 1193