Hakuna masheleñi

Mueteleli wanaha Hage Geingob viki yefelile nakutezi maikuto amuuso kuli hakuna masheleñi kuli lituwelo zababeleki bamuuso liekezwe. Mwamanzwi ahae hala mayemo anaha, kanako yakuina kwamandu amabeli amilao, Geingob nasika ambuka kubulelela babeleki basicaba, babasika fumana kekezo yalituwelo mwalilimo zelishumi zefelile kuli hakuna masheleñi. Naize hakuna yahanela babeleki kekezo yalituwelo yebaswanela. “Hakuna masheleñi. Kubunolo cwalo. Kuna ni butata bwa masheleñi. Kuna ni butata bwa kamaiso,” nekubulezi Geingob hane aalabela kwalipuzo zamuetapili wakopano ya PDM McHenry Venaani.

“Nelutolokezi babeleki butata. Swapo netatekilwe kibabeleki. Kiñi hamuhupula kuli Mueteleli wakopano yeo ukona kumitima masheleñi? Kuli abonise ñi? Haki masheleñi aka. Kabunolo hakuna masheleñi.” Tutengo totu yemela babeleki netukupile kekezo ya 10% yalituwelo, kekezo ya 25% yakufukuzezwa mutu haleka ndu, kekezo ya 9% yakulifa yasina ndu, kekezo ya 10% hala linzila kwababeleki babali mwatasa kamaiso, ni kekezo ya N$7 hala litifo zalibima. Nihaike tutengo totu yemela babeleki netulikile kukutisa kupo yakekezo fa 5%, muuso nosika talima taba yeo. Swanelo feela muuso yobata kutalima kikekezo yamasheleñi amaino, teñi babali mwatasa kamaiso baka fumana kekezo ya 4.5%.

Liswanelo zeñwi muuso zeubata kutalima kikezo ya 4.5% hala tuso yakuleka ndu, ni kekezo ya 10% hala swanelo yanzila hala babebeleki babali mwatasa kamaiso. Geingob nahupulisize babeleki basicaba kuli hakuna yabafa koto kakusa ekeza lituwelo, kono naize “kaufela luna luizi mwamukolo oswana, mi luswanela kuswalana kwamazoho.” Likwambuyu wamasheleñi Iipumbu Shiimi niyena viki yefelile naize bayemeli bandu yamilao banze banyaza sikoloti sa muuso, kono hape inge balwanela kekezo yalituwelo zababeleki. Nafile mamela kuli kuekeza lituwelo zababeleki kuka ekeza masheleñi auswanela kulifa muuso, ili taba yekona kuekeza kwasikoloti sa muuso.