NABTA ta ti ondado yeelefa natango oi li ngaashi ili
Hamushanga wehangano lebesa neetaxi loNamibia Bus and Taxi Association (NABTA) Pendapala Nakathingo okwa ti ehangano lavo ina li yandja elombwelo opo ondado yotaxi i ye poN$19.
Edi oda popiwa momukandapitifi wa dja mombelewa yahamushanga wehangano leelefa loNABTA Pendapala Nakathingo. Nakathingo ta ti ouyelele oo tau ti otaxi oya wedalwa no40% owa puka.
Nakathingo okwa ti NABTA ove li pyakidila nokukundafana nouministeli woilonga noyeendifo ku talike ngeenge oshinima shoku wedela eelefa nashi ye moilonga.
“Oshiwana nashi kale shangungumana manga tu kundafane nouministeli woyeendifo onghee ovashingi veelefa inava pitikwa okufutifa ovatwalelwa oshimaliwa shi li pombada manga,” Nakafingo ta ti.
Okwa ti NABTA oha ningi omapekapeko tete kombinga yova twalelwa novashingi ngeenge ondado otai dulu okuwedelwa.
Okwa weda po ta ti oshiwana otashi ka shivifilwa pambelewa ngeenge epangelo la tu kumwe neindilo lavo londado yeelefa iwedelwe.
Omupopiliko moministeli yeendjila noyeendifo Julius Ngweda okwa ti ouministeli wavo inau ya kula omukanda tau pula ondado yeelefa i kale ya wedelwa.
Meenghundafana a ninga naKundana Etitatu Ngweda okwa yelifa ta ti ope na onghundana tai dana onghandangala kutya vati ondado yeelefa oya wedelwa paife. Onghee okwa ti eshi kashi li mondjila nande, yee ta ti oministeli yavo inai koleka opo ondado yeelefa i kale ya wedelwa.
“Ohandi kunghilile ovashingi veebesa noutaxi opo vaha hetekele okufutifa ovatwaalelwa oshimaliwa shopombada. Oministeli yetu inai shi pitika,” Ngwenda ta ti.
Okwa denga omufindo ta ti keshe omushingi wolefa ta ka futifa ovanhu oshimaliwa shi li pombada nalopotwe opo aka katukilwa onghatu yopaveta.
Onghee okwa ti oshiima eshi nashi mone exulilo, shaashi osha nyika oulingilingi.
“Kombelewa yange okwa kala ta kuya ovanhu vahapu tava nyenyeta eshi tava futifwa oshimaliwa shihapu,” Ngwenda ta ti.
“Oshiwana xulifo po okukala tamu landula omauyelele oipupulu. Ngeenge ope na sha shimwe mwa hala okupula kaleni tamu kwatafana nopolifi ile mu dengele keengodi detu opo mu kale mwa kwashipaleka kutya omwa mona ouyelele womondjila,” Ngwenda ta ti.