Ongongo otayi eta uuyamba
Elenga enene lyomukunda Eengonyo, Efraim Weyulu okwa ti, ongongo oya simana oshoka oyi na omauwanawa ogendji. Ongongo otayi vulu okugandja oompito dhiilonga nohayi gandja iikulya niikunwa oshowo ohayi longithwa poompito dhilwe.
“Ongongo ohayi imi komugongo, ihe ngele oya gwile pevi ohayi ningi ongongola,” Weyulu ta popi ngaaka.
Ta ti, ongongo ohayi kolwa, ihe ohayi zi iiyula oshowo iipatu, mbyoka hayi vulu okulongithwa momikalo dha yooloka oshowo okueta po iikulya yilwe tayi vulu okulandithwa noku eta po oshimaliwa.
“Oongongo ohadhi eta po omagongo, ohadhi eta po omahuku haga ningi omagadhi goongongo. Ohadhi vulu okuninga iikunwa yilwe kaayina iikolitha,” ta hokola ngaaka.
Ta ti, ko kutya ongongo oyasimana momikalo ondhindji, onkene epangelo olya pumbwa okutula ongongo miilonga opo yi vule okueta elunduluko moshilongo.
“Shoka tashi vulu okuningwa opo ongongo yi ete po oompito dhiilonga nashiningwe, opo wo aanyasha ya mone iilonga,” ta kumagidha ngaaka.
Weyulu okwa li ta popi ngaaka esiku lyomagongo ngoka kwa li lya tyapulwa Olyomakaya mOmukunda Eengonyo momudhingoloko gwOndombe.
Ta gwedha po ta ti, oshituthi shoka okwa li sha ningwa pamuthika goshitopolwa ashihe, nelalakano lyokukaleka po omuthigululwakalo.
“Omagongo oshikunwa sha kala ko nale. ethimbo lyomagongo aantu ihaya pangulwa uuna ya yona oshoka kaye shi shoka taya ningi, ano oohapu dho pethimbo lyomagongo ihadhi landulwa,” ta fatulula ngaaka.
Weyulu ta ti, aantu ihaya ende niilwitho ethimbo lyomagongo, oshoka ethimbo ndyoka oha li kala lyombili, niinima iiwinayi ohayi indikwa yi holoke.
Maria Shinedima ayambukile momukunda Okahauyulu moshikandjohogololo shEngela okwa li a hokololele Kundana esimano lyomagongo.
Ta ti, Omagongo ohaga menekelwa ongula taga kolwa.
Ta popi kutya omagongo ohaga siikilwa miiyuma noshilapi kombanda, go taga tulwa mehala lya talala nawa.
Shinedima ta ti, omagongo ohaga kala mo omasiku gatatu nenge gane opo ga pye ga wape okunuwa.
Ta gwedha po kutya, okukola omagongo ohaku gongaleke aantu, okusimaneka omuthigululwakalo.
“Pethimbo ndyoka oomeme taya kolo, ohaya kala ye na omahokololo. Olyo ethimbo oohapu dhimwe kakwa li wu dhi shi to dhi uvu. Nongele ino kotoka oohapu otadhi ka ninga po dhoye,” ta popi ngaaka.