Kamwi a patulula Vuche vuche mOshakati

Ngoka a li nale ominista yuundjolowele nonkalonawa Richard Kamwi, okwa patulula ositola yuusila mOshakati.

Ositola ndjoka okwa li ya patululwa pambelewa kominista yiipindi nomangeshefelo Lucia Iipumbu, momudhingoloko gwOkandjengedi mOshakati.

Vuche vuche ositola yuusila noya nuninwa Aanamibia ayehe.

Iipumbu okwa ti, shika otashi ulike kutya Aanamibia otaya vulu okuya po niikulya yawo yene, okwi i hupitha nokukandula po ondjala oshowo okulanditha kondje yiilonga.

“Shoka tashi vulu okuhumitha komeho eliko lyoshilongo oshowo okuhwahwameka ehumo komeho,” Iipumbu ta ti ngaaka.

Minista okwa ti, shika natango otashi shonopaleke ondjala moshilongo oshowo okushonopeka elongitho lyoshimaliwa okulanda iikulya yilwe kondje yiilongo.

Ta popi kutya, ndika ethano ewanawa ta li ulike kutya Aanamibia otaya vulu okukandula po ondjala moshilongo, ngele ya hula ko oongaku etaya longo yiitulamo nokuya po noonkambandhala dhili ngaashi ndhika,” ta ti ngaaka.

Iipumbu ta ti, uunamapya otawu vulu okudhana onkandangala okuhulitha po ondjala oshowo okuhumitha komeho eliko, okupitila moompito odhindji.

“Oompito odhindji otadhi vulu okugandja natango iilonga moshigwana, unene kaanyasha mboka ya taalela uupyakandhi wiilonga moshilongo,” ta ti ngaaka.

Ta kumagidha aanyasha ye yepo nelyenge lya pama okulongitha oompito odhihe okuyapo noongeshefa tadhi vulu okulundulula onkalo.

“Uusila wandje ohandi wu landitha kondando yi li pevi lela. Iilya ohandi yi kutha kofaalama yandje mwene, koGrootfontein,” Kamwi ta ti ngaaka.

Ta ti, ooshako dhuusila wookilogalama 5 otau kala tau koho ongushu N$50, ooshako dhuusila yookilogalama 10 otayi kala tayi koho N$79.50. ooshako yookilogalama 20 otayi koho N$165, omanga ooshako dhuusila dhookilogalama 50 tadhi koho N$399. Ta ti, ngele oya mono omashina gawo yene, oondando dhuusila otadhi kashuna pevi lela, oshoka itaya longitha we oshimaliwa oshindji okufuta omashina goku eta po uusila.

“Sigo ompaka ootona 240 dhuusila odhalandithwa po nale, nomositola ngaashingeyi omuna ashike ootona dhi li 60,” ta ti ngaaka.

Ta gwedha po ta ti, elalakano okulanditha uusila oshilongo ashihe, kondando yi li pevi lela opo kehe gumwe a vule okuihupitha.

“Natango otuna elalakano lyokutsikila ongeshefa ndjika kiilongo yokondje, ngaashi Angola,”ta popi ngaaka.

Ngoloneya gwoshitopolwa shaShana Elia Irimari, minista gwiipindi nomangeshefelo Lucia Iipumbu oshowo omunafalaama Richard Kamwi pethimbo ositola yuusila Vuche Vuche tayi patululwa pambelewa oshiwike sha ziko.