Iipotha o70 ya lopotwa nuumvo Erongo
Omunambelewa gwoku pititha omauyelele gopolisi moshitopolwa shErongo Inspector Ileni Shapumba okwa ti, iipotha yi li 70 hayi zi pomahala gomanwino oya lopotwa okuza muJanuali sigo omwedhi nguka.
Shapumba okwa li a popi ngaaka esiku lyoshigongi shali sha ningilwa ooyene yomahala gomanwino mboka yali ya gongala okukundathana nkene ye na okulwiitha iimbula moshitopolwa moka.
“Iipotha mbyoka oya kwatele mo omadhipago, omadhengathano oshowo okuyuga oshigwana iinima yawo,” ta fatulula ngaaka.
Shapumba okwa kumagidha oshigwana shi nkondopaleke onkalo yegameno pomahala gawo, okugamena oshigwana oshowo okukeelela omaupyakadhi haga holoka pomahala gomanwino.
Ta ti, omahala gomanwino naga kale ge na aakeleli yomaliko taya kondolola onkalo oshowo taya hadha kehe gumwe uuka mehala ndyoka. “Otashi ti ngiini aantu yuuka mehala lyokwiinyanyudha ihe oya homata iilwitho. Aapolisi aluhe tayi ningi oshikonga ohayi zimbuka niilwitho yuudha epakete, ya kutha aantu taya ende uusiku, nenge ye li pomahala mpoka ”ta popi ngaaka.
Ta gwedha po kutya, shoka ohashi ya tula momalimbililo kutya iilwitho mbyoka oya shike. Nonando ndyoka ethano lya yela kutya o ohayi longithwa iimbuluma tayi lopotwa kehe esiku moosasiona moshitopolwa shoka.
Shapumba esiku ndyoka okwa ti, okuhomata iilwitho omanga omuntu e li mokati kaantu oshanika oshiponga.
“Ngoka ta vulu okutula pehala lye uucctv neshininge,oshokaohautukwatheleokukonga nokumona ashihe sha nigwa uuna pwa holoka uupyakadhi wontumba,” Shapumba ta kumagidha ooyene yoondingosho.
Ta ti, egameno pomahala ngoka olya pumbiwa lela, okuyanda iimbuluma.
Omukuluntu gosasiona yOmondesa Inspekta Hilma uugwanga esiku ndyoka okwa li a kumagidha ooyene yo manwino ya kale ya kotokela aapolisi, mboka yeya kwata ko pa mikalo dha yooloka opo ya pewe omalovu goondjo.
“Aapolisi mboka ye li moondjato dheni kayeli moshili, oyena ashike sho ya hala kune. Kayena esiku yemulombwele oshili, otaye mupukitha ashike,” ta popi ngaaka.
Ta gwedha po kutya, ohaya mbandukilwa kooyene yoomanwino moombelewa dhawo, taya lopota aapolisi inaaya hala okufuta oondjo dhawo.
“Yamwe ohaya pewa omikuli, yo taya kala inaayedhi futa. Onda hala ndimu yelithile kutya otamu hekwa,” ta kumagidha ngaaka.
Ta ti, ningeni hamu ningi onkambadhala naakomeho yaapolisi taye mupukitha, opo muuve uuyelele wo shili omanga inamuninga omatokolo ga hugunina.
Caption: Iipotha yi li 70 yiimbuluma ya lopotwa moshitopolwa shErongo moomwedhi ne