ǁGau!nâ-aon ge skolǀawemā!nandi ǁkhāǁkhākhâis !nâ ge ǁkhāǁkhākhâihe Sîsenao-i xa xoahe hâ

!Kharaga skolgu di ǂnûǁkhaeba-aon, Oshikoto ǀkharib !nân ge ǂoa ge wekheb !nâ koro tsēde ge !khōǂgā hâ i sîsenǁareǁkhāǁkhākhâis ǀhaosa ge ūhâ i. Nē sîsenǁareǁkhāǁkhākhâis ge ǀhûhâsi !ereamxasib tsî skolga mûǂams ǂnamipe ge !gao!gaosa i. Ministeris ǁGau!nâs, ǂNuwiǁkhāsib tsî !Hao!nāsi ǁNaetin dis ge nē ǀhaosa Rossing Foundations ǀkha !hûǁare hâse ge ǀaweǁguihe hâ i tsî ǁgau!nâs mâisan hîa !kharaga skolgu !aroma skolǀawemā!nandi !nâ nî ǂgaimâihe khoena nî ǁkhāǁkhākhâina gere ǁkhākhākhâi.

Sao ra di ge dana!khaidi nē ǁkhākhākhâis !nâ ge !â ide: skolǀawemā!nans ǁanin !harodi tsî !amǁareǀgaub, ǂhanugu tsî aiǂhanugu skolǀawemā!nans digu, ǁhûidi !gûǁnâs ǀgaugu, skolmariǁhōn (ministeris ra ǁgau!nâs hui!nâs ase mā maris tsî ǀhûhâsib ǀkhāba xu hâ ǂkhâ!nâs), tsî ǀhûhâsi !ereams tsî mâtis nēsa !hū!nāsi ǂgaoǀkhādi tsî ai!gûs ǁgauǁgaudi !nâ ra sîsens tsîna. Sîsenǂuira direkteri Rossing Foundations tawab, Job Kunovipo Tjihob ge ge mî, ǁnā skolgu hîa !gâise ǁgau!nâs tsî ǁkhāǁkhāsens !nâ ra ai!gû gu, !gâise ra !khōdanahesa tsî-i hoarahus di xū-i hîa ǂoaǂamsasiba ǁîna sī!nâsa ra ǁkhaemai-e “!nubusib ǁgûn di ǁhaos skolǀgôan ǁkhāǁkhāsens !nâs ǂnamipe hâsa.” ǁGûn nî oasase ǁîn soade māǀoas kara, o gu ge ǁnāti ī skolga ǂgaoǀkhāsa !harib ai ǀgôana nî sī-ū.

Tjihob ge skolgu ǂnûkhaeba-aona gere ǂgaoǂgao!nâ in ǁgūtsâ, ǁgûn tsî ǀhûhâsigu nē gôan ra ǂoaxaxugu ǀkhan kaise ǀgūse nî sîsenǁaresa tsî nēs !nâ-ū ǁawoǁawo !gâi aiǁgaudi tsî ǀamǂoadi nî hâsa. Oshikoto ǀkharisi mûǂamaob, Penda ya Ndakolob ge ǁkhā sîsenǁareǁkhāǁkhāsens ǁkhāǁkhākhâis ǀhaos tawa ge mî, ǂâuǀoahâ ǁgau!nâs garu-a !kharaga ǀgaugu tsî dīǀgaugu dītsâdi !nâ-ū ǀgui ǂâibasenhe tsî ra ǁkhorehe !gâi !nuriga nî sī!nâ ǁkhāsa. “Tita ge ǂgaikhâi tsî ra ǀkhoma, in skolgu ǂgaeǂguidi !nâ ǂnôa ǂgaeǂguiaona ǁawoǁawo, nē wekheb !nân go nē ǁkhāǁkhākhâis !nâ-ū a hō ǂans tsî ǁkhāsigan ǀoasase tsî ǂhanu ǀgaub !nâ hoa skolgu ǀawemā!nandi nē ǀkharib didi ǀkha nî ǀgoragusa.”