Geingob: Saob ge !goaxa ge !khāǁkhaesen

!KHAIǁAEB !goaxa xui-aob ge !Hūb di ǁûb, Hage Geingoba, hoa Namibiaǁîna ǁkhawa ra ǂgan, in ǁnān hîa noxopa Covid-19 ǁōs !aroma !khāǁkhae kaisen tamana ǁnāsa dī.

ǂOa ge kurib 2021, di soab ǁaeb !nâb ge Namibiaba ǀgaisase nē ǁōs !nâ-ū ǂgui !hūǁîna ǁōb !nâ-ū ge ǂoa!nâ. 26 !Hoaǂkhaib 2022 dis ai-i ge ge !nurihe, 602 khoen Covid-19 ǁōsa ūhâsa. !Nani khoen ge ǀaeǁgâudi !nâ ǁgoe, xawe ǀgui ǀkharib !nâ ǀgui tsî îbe ǁkhōǁkhōsa mâsi-i ǀkhaise. !Hau!hausasen ge hoan hîa ǀaeǁgâuǂgâ hâna !khāǁkhaesa tama hâ. !Hūb di danab ge, Unams di ǀasa ǂurusib !khaibab ge ǁîba !oa ǂgaiǀonhe hâ, Dr Hage Geingib Unam kampes tawa ǂhanusise gere ǀhui-am soab ai nēsa gere mî.

“Tita nî sado ǀkhomaba !aroma-i ge a ǀkhai. Sa ǂurusib !aromas ge nēsa. Xawe, ta ge nēsi ra ǀkhoma du, î du sī !khāǁkhae kaisen. Saob ge !goaxa. Tare-e ra ǁkhae tsi !khāǁkhaesensa?

Hanats sa ǂgoms !aromade nî ūhâs kara, o da ge ǁnāsa ra !gôa!gâ, xawets ge sats tsîna !hūb ǂurusiba ra !khom!nâ. Nē ǁōs ge kaise a ǁkhōǁkhōsa, Sada ǀhōna da ge ge ǂoa!nâ. ǀAokhoen âda ge ra ǁō. ǀKhoma da ge ra, toxopa !khāǁkhae kaisen re,” tib ge Geingoba gere ǀkhoma. Namibiab ge ǂoa ge kurib di Gamaǀaeb tsî ǂKhoesaob hâkha !nâ nē ǁōs xa ǀgaisase ǁnāǂamhe tsî ǂgui khoena ûiga ge ǂoa!nâ.

ǂOa ge kurib !Khaitsâb ǀams ai da ge 830 khoena ǁōb !nâ-ū ge ǂoa!nâ tsî da ge Aoǁkhumuǁkhâb ǀams ai ǁnā !gôaba ǂharo tsî 3 394 khoena Covid-19 ǁōs !nâ-ū ge ǂoa!nâ. ǁNās khao!gâ gu ge !gôaga hoaragase ge ǁgôaxa tsî da ge 26 !Hoaǂkhaib 2022 dis ai 4 025 ai ǁōb !gôaba ge mâ. Kaikhoen tsî ǀgôan (12-17 kurin kōse) hîa Covid-19 ǂguro !khāǁkhaesa hō hân ge ǀhaob ai 475 368, ǁîna xun 404 596 khoena ǀoasase a !khākhaesa hîa 23 %gu ǂâi!nâǁguihe hâ !gôab 1 779 271 diba ra dīǂuise.

Nēsis kōsen ge 52 474 khoena Covid-19 Booster !khāsa hō hâ. Geingob ge ǁnā ǁaxasib tawa mâǀhao da nî ǀgui Namibiab di aese !khaisa gere ǀgonǀgon!gao tsî !hūǁîna !haoǀgoras, ǀguriǀgui ǂâibasens tsî ǀkharigu !nâ hâ ǀgoras !oagu gere !khâikhom.