Afrikab !Khawagas ge Covids !gôagu ǂharosa ra hō!â
… !kharagasib tani ra ǁōs dib tsî ǂurusib ǁgaragu tsautsauhes xa ra hui!nâhese
BRAZZAVILLES – Afrikab, mûmûsase!Khawagas Afrikab dis !nâb ge Covid-19 ǁōs !gôaxa ǀasa-ammese ra ǂharo, Omicrons tsî tsautsauhe ge ǀhûhâsib ǂurusib ǁgaragu tsîn xa ra !nāsase ra !aromahese.
Hoa !Hūbaisi ǂUrusib !Nans (WHO) ge ǂoa ge wekheb Donertaxs ai gere ǀkhoma î gu !hūga ǀasa Covid !nôasa !âubasen hâse hâ, nēn xūna ra ǁgausensa !oa.
!Kharu ge Wunstaxs tsî Donertaxs hâra aib ge Namibiab
Covid-19 ǀasa positif !gôakha 222 tsî 210 ai ge mâ i tsî ǀkhamasa ǂharosa ra ǁgau, !kharu ge ǁkhâgu di ǂam !gôagu ǀkha i ra ǀgoweǀnōhe o.
Covid-19 !khāǁkhaedi !gôab ge noxopa kaise a ǂam, 23%gu ai ǀgui nēsi ǀoasase a !khāǁkhaesa !hūǁîn !gôaba māse.
Afrikab ge 52 878 Covid-19 ǀasa !nae!khaide 8 !Khaitsâb dis ai gere ǀam wekheb !nâ ǀgui ge !nuri, 38%gu di ǀarosensa ra ǁgause, ǁnāpab Afrikab !khawagas !âba 87% gu Afrikab hoab ǂhīgudi diba ǁkhā ǁaeb !nâ tani hâse, tib ge Abdou Salam Gueyeb, direkteri ǂōǂōsib !aroma ǂhomisase hâs tsî oe-ams dib Hoa !Hūbaisi ǂUrusib !Nans khari beros Afrikab dis tawa a sîsenxaba ge mî.
Afrikab !khawagas di Covid-19 ǀasa ǂhīgudi !gôaba !nāsase ra ǂhākhâib ge Suid Afrikab hîa !kharu ge ǁaeb !nâ wekhekorobe !nona !nāde ǀarosen hâ !gôaga ra ǁgauba. Suid Afrikab xōǀkhá kha ge Eswatinib tsî Namibiab tsîkha tsîna ǀgaisase ra ǂharo !gôagu hîa mâb hoaba 50%gu xa a !nāsa ǀasa !nae!khaide ge ǁgau, ai!â gere ǂoa wekhekha ǀkha i ra ǀgoweǀnōhe o, tib ge Gueyeba ge mî.
Nē kurib !Hoaǂkhaiba xub ge Suid afrikaba 1 369 Omicrons ǂhīgudi (BA.2), 703 !nae!khaidi (BA.4) tsî 222 !nae!khaidi (BA.5) dide ge !nuri WHOs ge ǀgūǁae dī !hara!âidi !oagu.
!Nāsase ǂâiǂhansensa !khōǂgā hâra ge BA.4 tsî BA.5 , ǁîra !nāsa ǀaeba !aroma ǁkhā xūna !khōǂgā hâ tsîb mâtis nēsa soros ǁkhaubas ǁkhāsiba a tsâǀkhā ǁkhāsa noxopa ǂanǂuisa tama xui-ao, tib ge WHOs !nuriba gere mî.
“Nē ǁōsa !khamdans !aroma da ge hoatsama ǂkhaigari tsî ǂhomisase hoaǁae nî hâ. ǁGuisa ǂurusib ǁgaraga ǁnā!gâs ge kai ǂkhôaba a !aroma ǁkhā.” ǂOa ge Donertaxs ai ge māǂuihe !nurib !oagub ge Afrikaba nēsis kōse 11.7 miljun ǂan!gâsa !nae!khaide !nuri hâ tsî 253 000 khoen ûiga ge ǂoa!nân tsîna.