Aavali ya ningi esiku ya lalela osikola opo ya mone oofooloma
AAVALI ya ningi esiku taya lala posikola Eenhana Primary nelalakano lyokumona oofooloma dheyindilo dhoompito dhaanona yawo, oya li ya shuna komagumbo gawo Omaandaha ya nyanyukwa sho ya yakulwa.
Aavali mboka okwa li ya lala posikola mpoka moshitopolwa shaHangwena okuza Etitano sigo okupendukila Omaandaaha, ye na iipundi yawo yi li momukweyo.
Saima Ndilula okwa ti, ina kala e na uupyakadhi wokulala mpoka oshoka oku na elalakano. Ta ti, kape na ngoka a li e mu thiminike opo a lale pondje yosikola.
“Onda ningi esiku tandi lala mokatenda, nda kalela ehala lyandje opo ndi mone ompitoyokumonaofoolomayomumwandje posikola mpaka,” ta hokolola ngaaka.
Ndilula ta ti, oya kala taya teleke uulalelo wawo mpoka, ya tegelela Omandaaha ya yakulwe.
“Itandi vulu okuza kegumbo oshoka otandi adha ehala lyandje lya kuthwa po
kugumwe, onkene onda kala nda kalela oshipundi shandje,” ta fatulula ngaaka.
Omuvali gumwe okwa li a lombwele iikundaneki kutya okwa hogolola okuninga omayindilo getambulo lyomona posikola Eenhana Primary oshoka oyi na elongo lyongushu. “Ondi shi okutanga uuwanawa welongo lyosikola ndjika oshoka nangame opo nda hita osikola yandje okuza kuushona, onkene nangame onda hala okanona kandje nako ka mone elongo lyongushu,”ta ti ngaaka.
Ta gwedha po kutya okwa li a ndhindhilike kutya oosikola odhindji dhokuushayi odhi na aalongwa taya nyengana kelaka lyoshiingilisa, ihe osikola
ndjika oyo yimwe ya hogolola elaka lyoshiingilisa onga lyimwe lyomiilongwa yawo ya simana.
“Onda kala posikola mpaka okuza Etitano oshoka ondi na lela ontseyo ya gwana kutya osikola ndjika ohayi kala yu udha aavali taya kongele aanona yawo omahala, onkene ngele owa ende kwa toka ito adha po omahala,” ta popi ngaaka
Ta fatulula kutya mEenhana omu na oosikola odhindji, ihe okwa hogolola osikola ndjoka omolwongushu yeyilongo hayi gandja kaalongwa.
Aavali oya li ya shuna komagumbo nenyanyu, taya ti oya nyanyukwa oshoka oya mono shoka kwa li ya hala.
Omukuluntu gwelongo moshitopolwa shaHangwena Isak Hamatwi okwa ti, osikola ndjoka okwa li ya hogololwa kaavali sha ikolela kehalo lyawo.
“Otu na oosikola dhooprimary dhi li ine mEenhana ihe aavali okwa li ya hogolola osikola ndjoka omolwomatompelo ye ga na,’’ ta popi ngaaka.
Hamatwi okwa ti shika okwa li sha holoka konima oofooloma dhomayindilo dha li dha piti mo omwedhi nguka.
Omukuluntusikola gwosikola Eenhana Primary kakwa li ta monika pethimbo ndyoka, taku fekelwa kwa li i ipyakindhila nelongekidho lyoofooloma.