Opolisi tayi kumagidha omagumbo ga kale ge na aantu omutenya
Opolisi moshitopolwa shaShana otayi kumagidha oshigwana shi kale sha kotokela ookalyamupombo taya ponokele omagumbo gaantu omanga ooyene ya ya kiilonga.
Aafuthi oya ponokele omudhingoloko gwOngwediva nokuyuga mo iinima yongushu yi vule N$66 000, sha ningwa mehuliloshiwike.
Sha ikolela kiiningwanima yomehuuliloshiwike omagumbo ngoka okwa li ga ponokelwa kaafuthi pokati koowili 11h00 Etine oshowo 10h00 yongula mEtitano.
Omagumbo gaali oga yakwa momukunda Ohakweenyanga omanga limwe lya yakwa mondoolopa yOngwediva.
Otaku hokololwa kutya omagumbo ngoka okwa li ga yakwa omanga ooyene ye li kiilonga.
Egumbo limwe lyomulumentu Omunamibia gwomimvo 36 okwa li lya yugwa otv, okamicrowave, oowili dhokoshikeho, omagadhi gokwiishasha kolutu oshowo iinima yimwepo ayihe kumwe kwa li ya pula ongushu N$22 000.
Opolisi tayi ti, natango omulumentu gumwe omanga a li e li kiilonga okwa adha egumbo lya tumbwa ofiliza, microwave oshowo ootv mbali ayihe kumwe okwa li ya pula ongushu N$21 400
Mesiku olyo tuu ndyoka omulumentu gumwe ngoka a li a zi mo mondoolopa niilonga okwa li a adha egumbo lye lya yugwa otv, oowili omagadhi gokwishasha kolutu omalovu oshowo oongaku, ayihe mbyoka okwa li ya pula ongushu yoshimaliwa N$22 949.
Opolisi otayi kumagidha oshigwana shi lopotele opolisi yi li popepi uuna sha mono aantu taya landitha iinima ya zi nokutumbulwa kaape na oombapila.
Natango oya kumagidha omagumbo ga kale ge na aakeeleli ethimbo alihe, go naga kale ga tema pondje ethimbo lyuusiku.
“Omutenya omalamba naga kale ga dhima oshoka aafuthi ohaya hilwa komalamba shoka tashi ya pe kutya kamu na omuntu megumbo,” tayi ti ngaaka.
Opolisi oya kumagidha oshigwana shi kale mekwatathano ewanawa naashiinda yawo opo ya kalelathane po uuna ya mono omayinyengo ga puka.