Va uda nai eshi va kufwa mo momadeulo oNDF
Ovanhu vamwe vomovanhu 48 ovo kwa li va tambulwa komadeulo etanga leameno (NDF) ndele tava shunifwa komaumbo, otava nyeyeta kutya oshinima eshi inashi ningwa pauyuki.
Omupopiliko omupopiliko wouministeli wetanga leameno Petrus Shilumbu okwa koleka kutya ovanhu o48 ova kufwa mo momaudeulo noku shunifwa komaumbo konima eshi va monika vehe na oukolela tau dulu omadeulo.
Ashike eshi inashi tambulwa ko kovadali noshoyo ovanyasha ovo va shunifwa ko.
Ovadali vamwe ova hokolola tava ti oshikondo shetanga leameno osha hepifa efimbo lounona vavo eshi va fiya po eefikola noilonga yavo opo vaye komadeulo etanga leameno ashike paife ova shunifwa ko.
Hileni Hatutale nokwa hokolola ta ti okaana kaye okwa li ha ka i koshipupudilo sha-IUM ashike ofikola oke i fiya po eshi ka tambulwa metanga leameno.
Ta ti okaana kaye oka kufwa mo momadeulo eshi omakonaakono ako opaunimaiti a holola kutya oke na omukifi wexuli.
“Onda hangika nda futa oshimaliwa shihapu shofikola yaye. Onghee kandi udite ombili eshi oshimaliwa shange sha hepa shaashi okaana kange ihaka i vali kofikola oke li ashike meumbo kehe na eshi ta ka ningi,” ta hokolola.
Hatutale okwa ti okwa li e na omukumo kutya okaana kaye otaka mono oilonga mepangelo opo ka dule okukwafela mofamili yavo ashike paife inashi ka enda vali nawa.
Omunyasha oo ina hala edina laye la tumbulwao kwa ti oshidjemo shomakonakono aye oundjolowele osha ulika kutya oku li nawa.
“Okudja opo onda fiya po ofikola shaashi okwa li nda lombwelwa kutya ohatu ka ya komadeulo kOkahandja,” ta hokolola.
Ta ti Okahandja ova ka ningilwa natango omakonaakono oshikando shitivali kundohotola umwe.
“Ndokotola oo okwa lombwela nge ta ti ondi na oudu wexuli ashike ame monghalamwenyo yange inandi dilika nale ndi na oudu wexuli. Onghee okudja opo onda lombwelwa kutya itandi twikile vali nomadeulo,” ta hokolola.
Johannes Sackeus naye omona okwa kanifa oilonga oyo a hauluka konima yoku tambulwa moNDF.
“Paife ounona vetu ove li pedu vehe na eshi tava ningi. Okaana kange ka ke na vali,” Sackeus ta ti. Okwa ti okwa uda nai shaashi okwa hangika a fiya po ofikola yaye eshi kwa li te lihongele ouhongifikola onghee paife oku na ashike okutwikila momudo tau ya shaashi momambo okwa hangika nale a dimwa mo.
Eshi a kwatafana naKundana omupopiliko mouministeli wetanga leameno Petrus Shilumbu okwa ti ovanyasha ova shunifwa ko shaashi oshikondo shetanga leameno inashi pitika okuyandja omadeulo komunhu e na oupyakadi womukifi wonhumba. “Ngeenge omunhu okwa twikile nomadeulo konima eshi a monika omukifi wonhumba eshi otashi dulu oku eta omunhu a kale a xulife pefimbo ta ningi omadeulo,” Shilumbu ta ti. Okwa yelifa ta ti oshikondo shomadeulo moNDF oha shi landula omilandu edi da tulwa po nghee ve na okukala va tambulwa momadeulo etanga leameno.
Shil um buok wat io van ingivo main di loo kw al iv apulwa opo va ninge etokolo ngeenge otava fiye po eefikola ile otava i komadeulo etanga leameno.