Pupkewitz a dika ovanafikola 42 eenghaku
Ovanafikola pofikola Naiti Combined School moshitukulwa shaMusati itava ka ende vali eemhadi kombada eshi va yambididwa nomapando eenghaku 42 kehangano loPupkewitz Wolkswagen lomOngwediva Etivali.
Eenghaku da yandjwa kofikola oda pewa ounona ovo va didilikwa hava i kofikola inava djala eenghaku.
Moshipopiwa shaye omukulunhuwiliki wehangano loPupkewitz Wolkswagen Veruschka de la Harpe okwa ti ehangano lavo otali lalakanene okushakeneka epangelo ondjilakati tashi pitile mokuyambidida eefikola di na ovanafikola ve li momhumbwe yomidjalofikola noshoyo oikwafifo yofikola.
Okwa li a lombwelwa kombinga yovanafikola pofikola Naiti hava ende eemadi kombada onghee naashi osha eta opo ehangano lavo li kale la yambidida ovanafikola.
Okwa ti ehangano lavo ota li twikile okuyambidida ovanafikola monooli ve li momhumbwe yomidjalofikola shaashi eshi tashi yandje ohokwe komunafikola opo a kale e na ehalo lokuya keetundi ngeenge e na omudjalofikola.
“Iha shi kala tashi ulike efano liwa ngeenge omunafikola ke li kofikola a tala vakwao va djala eenghaku ndele yee ina djala sha onghee eshi oha shi dulu okukufa omunafikola omukumo wokuli tula mo moilongwa yaye ile a kale a fiya po ofikola” Harpe ta ti.
Omukulunhuwiliki wehongo moshitukulwa shaMusati Benny Eiseb okwa ti eenghaku da pewa ovanafikola otadi ka lundulula onghalamwenyo yovanafikola shaashi itava ka kala vali tava dengwa komutenya keemadi.
Okwa ti unene tuu pefimbo e li lokwenye omutenya hau kala wa pupyala ovanafikola ova hava kala ve na oupyakadi wokudengwa komutenya shaashi ka kwa li ve na eeghaku.
Eiseb okwa indila omahangano a yooloka opo a kufe ko oshihopaenwa shokukala taa yambidida ovanafikola ve li moluhepo.