Shanghai Disney: Aatalelipo ya patelwa mo molwoCovid-19
Ehala lyomainyanyudho lyoShanghai Disney olya ninga limwe lyomomahala ga simana moChina ngoka ga patwa moshilongo shoka ihaashi toka oCovid.
Aantu oyendji oya lombwela kutya kape na omuntu taka ethiwa a ze mo mehalo ndjoka omanga inaa ulika iizemo yomakonakono tayi ulike kutya ke na oCovid-19.
Shika oshe ya sho moShanghai mwa lopotwa aantu yeli 10 ya monika ye na ombuto.
Epato ndjoka tali limbilike moChina olya etela aantu oomiliona opo ya patelwa mo iikando ya yooloka pomahala ga yooloka moshilongo ashihe.
Pethimbo epato tali tameke okwali kwa monika aantu oyendji taya yi ontuku, taya fandhuka po opo kaaya patelwe momahala.
Ashike mboka ya patelwa moShanghai Disney oye na elago oshoka omahala gomainyanyudho mehala ndika lya talika ko kutya olyo ehala li na ehafo kaaku na we muuyuni, ogeli mo ga patuluka.
Omuna na wo omahala gamwe ngoka ga ethiwa opo ga kale taga patuluka sigo opo 11h30.
Uuvudio tawu i taambathanwa komalungula otawu ulike nkene aantu oyendji taya matuka yaka ihakana komweelo omunene wehala ndjoka opo kaaya patelwe mo, ihe oya adha omiyelo dha patwa nale.
Epangelo moShanghai olya li wo lya pula komalungula opo kehe ngoka a ningilwa omakonaakono kaaha shune mo we meni lyehala lyomainyanyudho.
Okupata huka inaaku endela ko okwe ya konima yomasiku owala omashona sho ehala ndjoka lyali lya shonopeke omwaalu gwaatalelipo onga omukalo gwoku yanda etaandelo lyoCovid-19.
Shika hasho oshikando shotango ehala ndjoka tali pata. MuNovemba omumvo gwazi ko aantu yeli 30 000 oyali ya iyadha ya patelwa mo sho epangelo lyali tali pula opo kehe gumwe a ningilwe omakonaano gomumbuto omanga inaa ethiwa a ye kegumbo. Ngashingeyo oshili konyala uule woomvula ndatu oku za nkene China a lopotele omuntu gwotango a kwatwa koCovid-19 ndjoka ya taandele e tayi gombola aantu oomiliona noku dhipaga aantu oyendji muuyuni aguhe. Sigo omEtitano omuyalu gwaasi yoCovid-19 ogwali paantu 6,612,227.