Covids ge ǀasa xūna ge ǁkhāǁkhā da - Theofelus
ǁHUI!GAEB - !Nakaǂnôa Ministers ǂAnǂandi tsî ǁNâu-tsî-!Hoaǂharugus Texnoloxib dis, Emma Theofelus ge ge mî, Covid-19 ǁōs di khoraǂuisens ge !hūbaib a ǂhabase ǂgui!nâgu xūna a ǁkhāǁkhā da !khaisa, !gōsase internet !hûǁares ǂnamipe. Theofelus ge ǁHui!gaeb !nâ ge AfricaComs tsî AfricaTechs hâra di ǁÂudība gere ǁhao!nâ soab ai Nampasa ge mîba, Covid-19 ge ǁgariǁgarisaib ǀkha mâtikōse gu ǀhûhâsiga !gaeǁarede ǂhâba hâs dis age ǁgauǂui, aiǁgause internets !gaeǁaresa-ū ǁkhāǁkhāde !khō!oas, sîsenna dīs tsî beros !nâ hâ tamases tsînats a ǁkhāǁkhāsen ǁkhā !khais tsîna.
“Sîsenūs xūn tsî māhe ra !oabadi tsîn ge ǁnāpats sa khoesib !nâ nî hâs kōse ǀgui ī tama hâ, xawe !nūseba xuts ǂhâbasa !gaeǁaredi ǀkha a sîsen ǁkhās tsîna sâuǁkhāsiba ǀomkhâi kais !aroma ǂhâba hâ. Nēs ge mâǂoa ge ǁkhāǁkhādi di ǀgui Covid-19sa xu ge !naesa tsîs ge hoa !kharagagu ǂharugugu tsî ǂnûiǂgāde !hūbaib a ǂhabase ge tsâǀkhā,” tis ge ministersa ge mî. ǁîs ge ge mî, ǁnā-amagan ge ǂharugun tsî ǂnûiǂgādi tsîna nî dītsâ, ǀnî !âgu ân !nân internetsa ǂhâba hâ dīǀgauga nî !amǂgā tsî ǁnās ǂnamipe ǁnaetisa sîsenǀgauga nî dawasa î-i tā gui ǂharugu-i tsîna ǀasa ûiǀgauba xu ǁaraǂuisase tsâ. Theofelus ge ǀaro tsî ge mî, !hūbaibab tā ǁgau!nâsa ǁnā!gâ, nēs nî īs kara on ǀgôana ǂhâbasa ǁkhāsigu e-!amǁares ǂnamipeb !nâ a ǂhâbasaga nî ǀhanahe tsî ǁkhāǁkhāsentoas khao!gâ sîsen!khaigu !nâ nē dīǀgaugu xa nî aoǂuihe tsî ǁnâu!ā tama i amaga.
“Hoa xūn ge !amǂgāsase ra sîsenūhe texnoloxib !aroma tsî nēb ge ǁgariǁgarisasib hîa Covid-19 xa da ge a mâi-ai!âheba,” tis ge ministersa ge mî. Afrikab !hūgu ge ǀguipa sîsenǁares ǂhâsib !nâ hâ, ǂansa mā!kharus tsî texnoloxib (ICT) !harib ai, nēs nî ǂâuǀoasasib !nâ omkhâisens īǁkhāsiba mā tsî ǁanǂgāsaben di ûiǀgauga !gâi!gâi!nâ amaga. Ai!âs ge ministersa a mîs ge, ǀkharisise gu !nāsa Afrikab !hūga ǁkhā ǁgoaǂuide ūhâsa tsîs ǁnā-amaga sîsenǁare nîse īsa a ǂhâǂhâsa !khaisa !hūgu ǁaegu hâ ǂharuguba !gâi!gâi tsî sâuǁkhāsib ǀomkhâisa ǁawoǁawos ase.
“Sida ge ūhâ i ǁgamǁaredi !nâ ge a !gāsa !khais ge ǁgoaǂuidi ǁaupexa a ǀgui khami di oredi tsîna ra !gûǁaresa, o tare-i !aroma da sîsenǁare tsî omkhâisensa ǂkhâ!nâ tama hâ,”tis ge gere mî. Theofelus ge ǂhâǂhâsasib ǂhanugu nî hâ ǂhâbasa !âga ǁkhaubas !aroma !khaisa gere ǀgonǀgon!gao. - Nampa