Ngeno onda lopotele nale ngeno okaana kange kamwe oka xupa
Omudali te li vele ombedi eshi a dopa okulopota omonamati ou vati a kwata onghonga nokumitika po koundenge vavali
“Omudo wa djako eshi omumwangemati *Peter* a kwata nokuyandja eetelelo kokaana kange aka kali ken a omido 15 pefimbo opo, kandi na eshi nda ninga po shaashi ka kwa li nda hala omumati wange a kwatwa po kopolifi,” ta hokolola.
Omukainhu weedula 44 womukunda Oikango moshitukulwa shaMusati, ina younona voikadona vavali ovo va pewa omateelelo komukulu wavo ta hokolola, ye teli vele eembedi.
Ovaneumbo ava omadina avo oku eshivike kuKundana, ashike itaa ka longifwa molwaasho ovo va ninga oihakanwa yoixulo ounona veli koshi yomido 16.
Omukainhu ou okwa ti okwa ninga epuko linene eshi a dopa okulopota omonamati oo va ti a kwata onghonga nokuyandja omateelelo koundenge aveshe vavali, aka kanini ke na shike omudo 12.
Omukainhu ou paife oku li ta lele okatekulu keemwedi mbali ka dalwa kokamona kadona oko ka ninga oufimba tete. Okakadona oko ka ninga eteelelo tete oka li mOndodo Onhi-9 kali ke na omido15 pefimbo loshiningwanima, aka kanini ke li mOndodo Onhi-6 nomukulu wavo oo e li omufekelwa womido 22 oku li omunafikola koRuacana VTC.
Omukainhu ou okwa hokolola kutya eshi va dimbulula kutya okaana kaye oko paife ke na omido 16 oke na oufimba wa mumwaina, ponhele yoku ifana opolifi, ye nomusamane waye ove mu kaleka ashike omutumba mu kumaida opo a xulife po okuya moixulo nondenge.
Ta ti inava fekela ngeenge otaka ya vali moixulo nokandenge aka kanini po.
Ohaluka omafiku aa va dimbulula kutya okaana aka komido 12 nako ke na eteelelo leemwedi nhatu. Otaku fekelwa kutya oka kwatwa onghonga pokati ka June naJuli neudo. Oiningwanima ei aishe oya kala noku ningilwa meumbo lavadali vavo, noya ningwa oikando ihapu.
Okwa hokolola ta ti tete okwa mona olutu lokaana kaye ta li ende ta li lunduluka onghee okudja opo okwa pula okaana kutya oshike ke na edimo la kula.
“Okwa lombwela nge kutya oku na eteelelo lomukulu waye ou vati a kala nokuya naye moixulo. Okudja opo onda shivifila opolifi fiyo omufekelwa ta kwatwa po.”
“Ondakumwifakoshikumungu eshi. Omufekelwa okwa ya elihongo lokaana kange moshipala shaashi paife ita ka kala vali ke li tula mo moilongwa yako,” ina yokaana ta ti.
Omukainhu oo okwa ti ngeenge a tala okaana kaye keedula 12 oha tameke ta kwena shaashi oha kala a etela okaana kaye onghenda eshi ke na eteelelo ina ka fika okupulumuna.
Okwa weda po ta ti nakuninga oshihakanwa okwa li a twalwa koshipangelo opo a ka mone omayakulo exungomwenyo onghee paife ota twikile no kuya kofikola.
Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti omufekelwa okwa kala nokuningila oundenge omatilifo kutya oteva dipaa ngeenge ova lombwele ovakulunhu.
Onghee vati okudja opo nakuninga oshihakanwa okwa kala nokungilwa omunyonena wopaixulo ashike okwa kala e na oumbada wokulombwela ina meumbo.
Omufekelwa okwa hokoloka momhangu noshibofa shaye osha undulilwa komafiku 21 Februali 2023.
Eshi a kwatafana naKundana minista woukashike kookanhu nonghalo nawa yokaana Doreen Sioka okwa ti omulumenhu ou vati a mitika okaana okwa pumbwa okupewa ehandukilo lopaveta shaashi okwa longa oshimbuluma sha kula shekwatonghonga eshi a ya moixulo nokaana ke na eedula ina di fika.
Okwa ti kape na omulumenhu e na oufemba wokukala aya moixulo nounona va shona onghee ku keshe ou teshi ningi ota kala a kwatwa po diva.
“Paife omulumenhu ou okwa ya onghalamwenyo yokaana moshipala shaashi ita ka dulu vali oku li honga nelitulemo,” minista ta ti.
Okwa kumaida ovadali opo va xulife po okukala tava e fa ovalumenhu tava i moixulo nounona vavo shaashi eshi oshi li omahepeko omomaumbo.
Okwa weda po ta ti ovalumenhu ve li mekwatafano lopaihole nounona va shona nava lopotwe keembelewa doukashike kookanhu nonghalo nawa yokaana.
*Kali shi edina laye loshili*