Omunafikola a tatula omakende otuwa yookalyamupombo
Omukainhu weedula 28 ha fikola koshiputudilo Unam mOshakati okwa tatula omakende otuwa yookalyamupombo ovo kwa li tava kendabala oku mu nyeka omaliko aye.
Oshiningwanima eshi osha ningwa Omaandaxa mOshakati efimbo lokonguloshi lwopotundi 21h30. Omupopiliko wopolifi moshitukulwa shaShana Inspector Thomas Aiyambo okwa hokolola ta ti omunafikola okwa lefela otuwa okudja pofikola a yuka keumbo ashike mboli motuwa omo okwa li mu na ookalyamupombo, navali kotuwa oku na eenomola doipupulu.
Vati ovafekelwa ova shinga va yuka kombaanga yoBank Windhoek opo omufekelwa umwe a ka nane oshimaliwa nokonima ova shinga va yuka kombinga yaKahao. Opolifi oya ti eshi ve li mondjila omufekelwa umwe okwa kufa ombele ndele te i ulike omunafikola te mu pula oimaliwa noshoyo okabob kaye. Opolifi oya hokolola tai ti okudja opo omufekelwa okwa denga nakuninga oshihakanwa neengonyo moshipala te mu kondjifa a yandje eenomola dokabob kaye.
Okudja opo nakuninga oshihakanwa okwa kuwa nokutameka ta lyata ekende lotuwa fiyo tali ta tuka. Opolifi oya ti omukwashiwana umwe eshi a shakeneka otuwa mu na omukainhu oo ta kuu okwa shivifila opolifi diva nokonima opolifi oya landula otuwa oyo.
Vati opolifi oya hanga ovafekelwa ve li motuwa nomukainhu komukunda Othingo popepi nonhele hai kupulwa oimbodi nokudja opo eshi ovafekelwa va mona opolifi ova faduka po va uka kolukanda Uupindi,va fiya po otuwa yavo. Nakuninga oshihakanwa naye vati omo a hangika a ninga oipute komaulu eshi kwa li ta lyata omakende motuwa nokudengwa.
Otuwa yovafekelwa oya kufwa po kopolifi nomufekelwa umwe vati okushiivike nawa nedina Shivu onghee opolifi oye lipyakidila nokukonga ovafekelwa. Oshiningwanima shikwao oshomukwashiwana waChina weedula 49 vati a ponokelwa koolyamupombo nokunyekwa oshimaliwa N$6 600, ongodi yopeke yoHauwei P30 yongushu N$14 630 nomukanda wokushinga.
Oshiningwanima eshi osha ningwa Omaandaxa poshitaashi shomahooli shedina Okapana mOndangwa lwopotundi 09h00.
Opolifi oya hokolola tai ti ovafekelwa vatatu vovalumenhu ova umba ondjebo loikando ivali nokuponokela omulumenhu oo.