Likolo la makete likutisa baitomboli baCovid
Keto ya likolo la makete viki yefelile kukutisa baitomboli kaufela baCovid-19, bao tumelelano yapeleko yabona nefelile la 31 Yenda 2022, ne amuhezwi katabo kibaitomboli nihaike likolo halisika patalaza mabaka atisize cwalo.
Mwaliñolo la memo lene lifilwe kimuzamaisi yomuhulu walikolo Ben Nangombe Labubeli, likolo neli zibisize baeteleli kaufela bamakete mwalikiliti kukutisa baitomboli kaufela baCovid-19. “Temuso kiya kumizibisa kuli baitomboli kaufela baCovid-19 bao tumelelano yamusebezi nefelisizwe balumelelwe kukuta nikuto kala musebezi kapilipili. Muzibise baitomboli kaufela bane babeleka mwa lipatela kapa likiliti kaufela,” kubaleha memo.
Martha Hamukoto, mubeleki wamakete kwamutayi obona zaCovid-19 kwa sipatela sa mubuso mwa Grootfontein, naize nanyemile likolo halifelisa tumelelano yamusebezi mwakweli ya Yenda.
“Nenina ni sikoloti mwasintolo sa Lewis. Neni sabizi sakueza kasamulaho tumelelano yaka ifeliswa. Kacwalo nitabile kuli likolo lilubizize kuli lukute kwamusebezi,” nabulezi. Naekelize kuli banabahae bababeli, nibapepwa nibona baitingile kuyena. Muitomboli yomuñwi waCovid-19 Natangwe Daniel, yana belekela kwa Oshakati, naize hana keto sina haba beleka kakutukufazwa nikuba mwakozi yaku yambula kakokwani. “Lumwa kozi halubeleka nibakuli baCovid-19. Nihakulicwalo, ni itukiselize kukutela kwamusebezi sina hanisa beleki,” nabulezi. Anna Simon yabile muitomboli waCovid-19 kuzwa kweli ya Lungu 2020, naize likolo liswanela kuba feelela musebezi kakuli basebelize katata.
“Likolo liswanela kulunga kuli lubatu. Luezize musebezi omuñata Covid-19 hane iatile mwa 2020 ni 2021,” nabulezi. Baitomboli babihiwa kuli bafumana N$6 800 kakweli. Mwakweli ya Yenda likolo la makete neli ize nekusina bane balobalizwe mwasipatela kapa bane batimezi kabaka la Covid-19.
Mwakweli ya Muyana, naha nefelisize litaelo kaufela zaCovid-19 zene ezizwe mwasilimo sa 2020.
Butuku nebu bulaile batu babalikana 4 080 mwanaha Namibia. Nangombe nasika fumaneha kuli abe nisa kubulela, kuli kiñi hane bacincize muhupulo kasamulaho ataelo yana file kuli tumelelano yabona ifeliswe kwamafelo a Yenda.
Pili kufeliswa kwatumelelano nebakile bafa temuso la 19 Kandao 2022 kuli tumelelano yabona neya haisi la 31 Ñulule 2022.