Okanona kasi sho kagu kondongi
Okanonona komimvo omugoyi okasi eso lyiinyanyaleka sho kagu noku hililwa miihwa kondoongi ndjoka kwali ka londa.
Omukuluntu gopolisi moshitopolwa shaShikoto Teopoline Kalompo Nashikaku okwa ti oshiningwanima shoka osha holoka momukunda Amilema B momundhingoloko Omuthiya mEtitatu komatango.
Otaku hokololwa kutya okaanona hoka ko kamati okali pamwe na kuume yako taya zi ko kapomba komeya, no kwali ya kayile oondoongi ndhawo.
Nashikaku okwa hokolola kutya okanona hoka okali kiindhingile ongondhi okuza mothingo yondoongi, ndyoka kwali ya tameke okunuka noku tondoka sigo tayi ka gwitha ko,
Otaku hokolola kutya ondoongi okwali ya tsikila oku kokolola okanona hoka sigo omiihwa.
Aakwanezimo sho ya ka thika poshiningwanima oyaadha nale okanona hoka ka hulitha.
Nakusa okwa tseyika nedhina Jordan Enkala. Oshiningwanima shoka osha holoka ashike konima yoomwendhi mbali dha piti po sho, omulumentu gomimvo 33 a si sho anuwa a indhenge koshithindi pethimbo a gu kondoongi ndyoka a li a londa.
Sha ikolela kepeko lyopolisi, oshiningwanima shoka osha holoka momukunda Sikarosompo moshitopolwa shaKavango gokuninginino.
Otaku hokololwa kutya omulumentu ngoka gwendhina Kudumo Petrus Nyango okwa li pamwe na kuume ke taya hingi oondongi.
Opolisi oya ti, aalumentu mboka okwa li ya londa kehe gumwe kondongi, omanga ya li taya tindha oondongi dhilwe mbali dha li komeho gawo.
Ta yi ti pethimbo ndyoka Nyango okwa li agwithwa ko kondoongi, eta gwile kombanda yoshithindi shoka she mutsu moombati.
Otaku hokololwa kutya Nyango okwa li a hulitha manga a li a tegelela ohauto a falwe koshipangelo.
Caption: Aakwashigwana yamwe ohaya longitha oondongi onga omikalo dhiienditho ashike odha nika wo oshiponga. (Ethano: olya longithwa owala onga oshiholelwa)
– vkaapanda@nepc.com.na